*ಮತ್ತೆಂದೂ ಕಾಣದಿರು ನೀ 2020!*
ತುಂಬಿದ ಕಂಗಳ ವಿದಾಯ ನಿನಗೆ,
ಮತ್ತೆ ಕಾಣದಿರು ಓ 2020!
ದುಡಿವ ಕೈಗಳ ಕನಸಿನ ಕೆಲಸ ಕಸಿದೆ,
ದಿನದುಡುಮೆಯವರ ಹೊಟ್ಟೆಗೆ ಹೊಡೆದೆ,
ಬದುಕನು ಭರಿಸಲಾಗದ ಬವಣೆಯಾಗಿಸಿದೆ,
ನಗುವ ಕಂಗಳಲಿ ಕಂಬನಿಯ ತುಂಬಿದೆ,
ನೀನಾರಿಗಾದೆಯೇ ಓ 2020!
ಹಿರಿಯ ಜೀವಗಳು ಬೆಂದು ಬವಳಿದವು,
ಕಾಲು ಮುರಿದ ಕಪ್ಪೆಗಳಂತಾದರು,
ಮಿಡಿವ ಮನದಲಿ ಕಂಬನಿ ಮಡುಗಟ್ಟಿತು,
ನೋಡು ನೋಡುತಲೇ ಅಂತರ್ಧಾನರಾದರು,
ನೀನಾರಿಗಾದೆಯೇ ಓ 2020!
ನೆನ್ನೆ ಮೊನ್ನೆ ಕಂಡ ಗೆಳೆಯರು,
ಮನಬಿಚ್ಚಿ ಬೆರೆತು ನಕ್ಕವರು,
ತಿರುಗಿ ನೋಡುವಷ್ಟರಲಿ ಮರೆಯಾದರು,
ನಿನ್ನ ಕ್ರೂರನೋಟಕೆ ಬಲಿಯಾದರು,
ನೀನಾರಿಗಾದೆಯೇ ಓ 2020!
ಕಂದಮ್ಮಗಳ ಕಲಿವ ಶಾಲೆ ಮುಚ್ಚಿಸಿದೆ,
ಹೊರಗೆ ಕಾಲಿಡುವ ಧೈರ್ಯ ಕಸಿದೆ,
ಗೆಳೆಯರೊಡನೆ ಬೆರೆಯದಂತೆ ಬಂಧಿಯಾಗಿಸಿದೆ,
ಮೃದುಮನಗಳಿಗೆ ಮಾಯದ ಬರೆಯೆಳೆದೆ,
ನೀನಾರಿಗಾದೆಯೇ ಓ 2020!
ವ್ಯಾಪಾರಗಳ ದೀವಾಳಿ ತೆಗೆದೆ,
ವ್ಯಾಪಾರಿಗಳ ಬೆನ್ನಿಗೆ ಚೂರಿ ಇಟ್ಟೆ,
ಹೊಟ್ಟೆಗೆ ಉರಿವ ಕಿಚ್ಚನ್ನಿಟ್ಟೆ,
ಉಳಿದದ್ದು ಕೇವಲ ತಣ್ಣೀರ ಬಟ್ಟೆ,
ನೀನಾರಿಗಾದೆಯೇ ಓ 2020!
ಹುಚ್ಚಾದೆವು, ಪೆಚ್ಚಾದೆವು, ಬೆಚ್ಚಿದೆವು,
ಎಲ್ಲ ಮುಚ್ಚುವ ಮುಂಗೋಟಿಯ ಮರೆಯಲ್ಲಿ,
ನೋವು, ನಿರಾಸೆಗಳ ಅಡಗಿಸಿಕೊಂಡೆವು,
ತಲೆತಗ್ಗಿಸಿ ಅಸಹಾಯಕರಾಗಿ ನಿಂತೆವು,
ನೀನಾರಿಗಾದೆಯೇ ಓ 2020!
ಈಗ ಹೇಳುತಿರುವೆವು ನಿನಗೆ ವಿದಾಯ,
ನೀ ಮರೆಯಾಗುತಿರುವುದು ಅಭಯಪ್ರದಾಯ,
ಶೋಕದ ಕಣ್ಣೀರು ಆವಿಯಾಗುತಿದೆ,
ಆನಂದಭಾಷ್ಪ ಮೂಡುತಿದೆ ನಿನ್ನ ಬೆನ್ನ ಕಂಡು,
ಹೋಗು, ಇನ್ನು ನೀ ಬರಬೇಡ 2020!🙏
ಆದರೆ ನನ್ನ ಸಮಾನ ಯಾರಿಲ್ಲ
ಎಂಬ ಗರ್ವದ ಅಹಂಕಾರದ ಮನಕೆ
ತಲೆ ಬಾಗುವುದಾ ಕಲಿಸಿದೆ
ನನ್ನೊಂದಿಗೆ ನಾ ಬೆರೆಯುವುದಾ ಕಲಿಸಿದ ಮಹಾ ಗುರುವಾದೆ ನೀ
ಹೋಗು...ಇನ್ನೂ ಕಾಡದೇ...
ಮತ್ತೊಮ್ಮೆ, ಮಗದೊಮ್ಮೆ ಬಾರದಿರು...
ಹೊರಡು ನೀ ಬಾರದಾ ಲೋಕಕೆ
ಒನ್ಸ್ ಫಾರ್ ಆಲ್ ಗುಡ್ ಬೈ 2020!🙋♀️🙋♀️
