kar loonga jam'a daulat-o-zar us ke baad kya
le loonga shaandaar sa ghar us ke baad kya
may ki talab jo hogi to ban jaaunga main rind
kar loonga maykado ka safar us ke baad kya
hoga jo shauq husn se raaz-o-niyaaz ka
kar loonga gesuon mein sehar us ke baad kya
she'r-o-sukhan ki khoob sajaaoonga mahfilein
duniya mein hoga naam magar us ke baad kya
mauj aayegi to saare jahaan ki karunga sair
waapas wahin puraana nagar us ke baad kya
ik roz maut zeest ka dar khatkhataayegi
bujh jaayega charagh-e-qamar us ke baad kya
uthi thi khaak khaak se mil jaayegi wahin
phir us ke baad kis ko khabar us ke baad kya
By : Qamar Jalalabadi
Voice : Wajid shaikh
Https://www.instagram.com/iwajidshaikh
