阿里娃你好，我好唔开心啊！我今年43岁，大概一年半前，我老公因为起屋受咗内伤，就从此离开咗我同两个仔，一谂起哩度，我又忍唔住哭啦……我哋係广西人，喺佛山打工。我一直想喺广西乡下起屋，第日番广西养老，因为我嘅坚持，但我哋又唔係好有钱，我老公抽时间全部自己亲力亲为，起紧楼梯嗰阵唔小心差错脚跌亲，受咗内伤以为无乜紧要，就无去睇医生啦。番佛山上班后，有一晚对我特别温柔，揽住我讲咗好多嘢，哩一次係佢最后一次揽住我啦，朝早起床佢已经无咗知觉……老公一直将我保护得好好，我粗重嘢都唔使做嘎，佢一走，我就要担起养家嘅责任，好攰都要死顶。好几次都想跟住佢走咗算啦，但仲有两个仔，我唔可以放低佢哋咁自私嘎。大仔宜家18岁，因为屋企环境唔好高中毕业就出去打工，细仔宜家先12岁读紧六年级，仲需要照顾佢起居饮食。我为咗赚钱养家，经常加班到好夜，细仔只可以食住八宝粥或者其他干粮等我落班再煮饭。但最近连续三日收到老师嘅电话，话细仔三日都无番学。我番屋企揾唔到个仔，喺村委会查监控录像先知道个仔无出门口，于是我番屋企疯狂咁揾仔，原来佢将书包塞入床下底，自己将自己关喺衣柜里面。我带住个仔去学校揾老师了解情况，再仔细问个仔，先知道原来佢同最好嘅同学嘈交唔开心，就唔想番学……
阿里娃，有个同事劝我揾神婆问下，係米有D乜嘢搞住我个仔，问下我老公係米有嘢要对我讲。我无钱揾神婆，而且我又唔係好信哩D嘢。我老公父母好大年纪啦，D兄弟姊妹话唔可以将我老公过身哩件事话俾佢哋听，我就一年半未番过乡下，我觉得自己背负太多，成日都想喊，你话我点办好呢？——X女士
