Devotional (5th January 2021)
Topic (4th -10th January 2021) – “Ka Jingainguh” (Thanksgiving).
“To ainguh ia U Trai, to khot kyrpad ia ka kyrteng jong U, to pynbna ia ki jingleh jong U hapdeng ki kynja bynriew, to pynkynmaw ba ia ka kyrteng jong U Ia pynkyntiew.” (Isaiah 12:4)
**************************************
Ha ka spah snem kaba 17, U Martin Rinkart uba long u pastor jong kawei ka Balang ha Saxony kaba don ha Germany, u la long pastor palat 30 snem kata ha ka por jong ka thma bah bad ha ka por jong ka khlam. Ki la don ki snem kiba ha ka shi snem u la pynlong ia ki jinglehniam ha kaba leit on tep ia kiba iap haduh 4000 sien, kaba kynthup ia ka jinglehniam kaba u hap ban pyniaid hi na ka bynta ka jingkhlad ka lok ka jong u. Ha kata ka por, ka bam ka kyrduh haduh katta katta, ki la don ki sngi ba ma u bad ka iing ki hap ban shah thngan. Ula mad bad ia kynduh shisha ia ki jingeh kiba khraw, hynrei wat hapdeng kita ki jingeh, u iaineh skhem ha ka jingngeit ka jong U ha U Blei bad u iai im ka jingim kaba iai ainguh ia U Blei wat hapdeng ki jingeh, bad kata ka mynsiem jong ka jingsngewnguh ka jong u ka la pynlong ia u ba un thaw ia ka jingrwai kaba u la ai kyrteng ha ka ktien German, “Nun danket alle Gott,” bad ka dei kawei na ki jingrwai ba pawnam, ia kaba la la pynkylla sha ka ktien English, “Now Thank We All Our God.”
U Rinkart u bud ia ka nuksa ka jong U Isaiah uba la btah ia ki Khun Israel ba ki dei ban ainguh ia U Blei ha ki por baroh, watla ki mad ia ki jingeh bad ia ka jingbitar ka jong U Blei (Isaiah 12:1), kin ainguh ia U Blei watla ki nongshun ki wan ban banbein ia ki. Wat hapdeng kita ki jingeh ki dei ban iai pynbna ia ka kyrteng ka jong U Trai sha ki kynja bynriew baroh (Isaiah 12:4). Ka long kaba suk ia ngi ba ngin ainguh ia U Blei haba ngi iohpdiang ia ki jingkyrkhu bad haba ngi lait na ki jingeh, Hynrei U Isaiah ha kane ka kitab ka jong u (Isaiah 12) u khot ia ki Khun Israel ban ainguh wat hapdeng ki jingeh. U Isaiah u ong shuh shuh ia ki khun Israel (Isaiah 12:5) “To rwai ia U Trai; namar U la leh ia kiei kiei kiba bha tam; to pynbna ia kane ha ka khyndew baroh.” Ai namar kata ba wat hapdeng ki jingeh ba ngi la iaid lyngba ha une u snem 2020 pynban haba ngi rung sha une u snem uba thymmai to ngin rung ryngkat bad ka jingainguh ia U Blei, bad ngin iai pynbna ruh ia ka kyrteng jong U hapdeng ki kynja bynriew baroh.
Jingduwai: - “Ah U Blei, nga ainguh ia Me ia ki kam kiba phylla kiba Me la leh ha ka jingim ka jong nga, ka jingieit ka jong Me ia nga ka long kaba phylla kaba ngam lah ban batai, iarap ia nga ba ngan sngewnguh ia Me ha ki por baroh.” - Amen
U Blei Un kyrkhu, Pastor Bidonbok Syiem.
