Devotional (20th October 2020)
Topic (19th – 25th October 2020) – “Ka jingsheptieng” (Fear)
“Nga la wad ia U Trai, bad U la phai ktien ia nga, bad U la pyllait ia nga na ki jingsheptieng jong nga baroh.” (Salm 34:4)
**************************************
Ka jingsheptieng ka rung ha ka dohnud jong ngi u briew ha kano kano ka por kaba ngim poi pyrkhat. Haba ka jingsheptieng ka don ha ka jingim ka jong u briew ka wanrah ha ka jingim ka jong u ia ka jingduh jingkyrmen, ka tuh noh ruh ia ka jingsuk na ka jingim u bad ka pynshad shane bad shatai ia ka jingpynleit jingmut jong u briew. Ki don shibun ki daw kiba pynsheptieng ia ngi, teng teng ngi sheptieng ia ka jingpang, ngi sheptieng ioh ba ka jingiadei jong ngi kan dkhut noh, ngi sheptieng ioh ngi duh ia ka kam ka jam bad kumta ter ter. Ka jingsheptieng bunsien ka pynphai noh ia ka jingpynleit jingmut jong ngi sha kiei kiei kiba iduh jingkyrmen bad ka pynduh ia ka mynsiem ban shaniah.
Haba ka jingsheptieng ka wan ha ka jingim ka jong ngi katno kan long kaba sngewtynnad ban pule bad phai sha ka Salm 34:4, ka Salm kaba U David u la thoh,“Nga la wad ia U Trai, bad U la phai ktien ia nga, bad U la pyllait ia nga na ki jingsheptieng jong nga baroh.” Ka jingkylli kaba mih na kane ka dkhot ka long, kumno U Blei U pyllait ia ngi na ka jingsheptieng? U David u jubab ia kane ka jingkylli ha ki dkhot kiba bud, ha ka dkhot kaba 5 (Salm 34:5) u ong “da kaba ngi khmih sha U Blei.” Dei haba ngi phai sha U Blei ba ka jingsheptieng kan jah na ka jingim ka jong ngi. Nangta shuh shuh, ngin lait ruh na ka jingsheptieng ong U David, (Salm 34:8) ‘dei haba ngi shaniah ha U Blei.’ Nangta U David u iathuh pat ha kane ka Salm, ba kadon kawei pat ka jait jingsheptieng, ka jingsheptieng ym ka ban pynduh jingkyrmen ia ngi, hynrei, ka jingsheptieng ka ban ai jingkyrmen ia ngi, bad kata ka jingsheptieng kadei ka jingsheptieng ia U Trai. Ha ka dkhot kaba 7, (Salm 34:7) u ong, “U Angel U Trai u ker sawdong ia kita kiba sheptieng ia U, bad u pyllait ia ki.” Haba ngi sheptieng ia U Blei u Angel jong U un da un ker ia ngi. Bad kaba sngewtynnad ka long, ba haba ngi sheptieng ia U Blei ngin mad ruh ia ka jingpyndap ka jong U bad ngin nym shem kano kano ka jingkyrduh (Salm 34:9). Katno ka long kaba sngewtynnad ban tip kumno ba U Blei U pyllait ia ngi na ka jingsheptieng, bad haba ngi shepteing ia U Blei U don ban kyrkhu ia ka jingim ka jong ngi da kaba U phah ia ki angel ban da ban sumar ia ngi bad da kaba U ai ia ki jingdonkam jong ngi kiba manla ka sngi ba ngin ym shem kano kano ka jingkyrduh.
Jingduwai: - “Trai nga tip ia ki jingkhuslai bad ki jingsheptieng kiba nga don, nga wan ban bret ia ki ha ki kti ki jong Me, ai ha nga ia ka jingsuk ka jong Me, haba ngan iaid lyngba ia kane ka sngi.”- Amen.
U Blei Un kyrkhu, Pastor Bidonbok Syiem.
