Devotional (8th October 2020)
Topic (5th – 11th October 2020) – “Ka jingai- mynsiem” (Encouragement)
“…ba nga ruh ngan ioh sngewhun ynda nga la tip ia ka jinglong jong phi”
(. . . that I also may be encouraged when I know your state) (Philipi 2:19)
**************************************
Ban ai mynsiem ia kiwei kadei ka jingtrei ne ka ministry kaba donkam tam. U Paul ha ka shithi sha ki Philipi u iathuh ruh ba ka jingai-mynsiem ia kiwei ka long kaba donkam hynrei, ka long ruh kaba ngi hap ban aitilut ialade.
U Paul ha kane ka por u don ha iingbyndi ha Rom, hynrei, u la ioh ia ka jingmyntoi kaba khraw da ka jingwan jngoh kaba na ka por sha ka por bad na ka jingai mynsiem ka jong U Timothy, kumta u la kut jingmut ban phah ia U Timothy na ka bynta ban leit ban ai ka jingshakri sha ka Balang ha Philipi bad lyngba jong U Timothy un ioh ban tip ruh kumno kiba ngeit ha Philipi ki im. U Paul u jied ia U Timothy ym ia kiwei ban leit, ka daw, ong U Paul, (Philipi 2:21) ’ba kiwei ki kham pynleit jingmut ialade bad kim pynleit jingmut ha U Khrist.’ U Paul katkum kane ka shithi sha ki Philipi (Philipi 2:19) u kwah ban ioh mynsiem ne ban sngewhun haba un iohsngew ia ka report na U Timothy shaphang kiba ngeit ha Philipi, bad dei na kane ka daw ba u phah ia U Timothy ban leit ban ai mynsiem ia kiba ngeit ha Philipi, bad haba U Timothy un wanrah ia ka khubor kaba bha shaphang jong kiba ngeit ha Philipi kata hi kan ai mynsiem ia U Paul watla u don ha ka iingbyndi. U Epaphraditos, ia uba la thoh ha kane ka juh ka bynta jong kane ka shithi sha ki Philipi (Philipi 2), u long u briew uba kham pynleit jingmut ha U Khrist, u dei u nongmihkhmat jong ka Balang Philipi, katba u dang wan ban jngoh ia U Paul ha ka ingbyndi bad ban iarap ruh ia U Paul haba U Paul u don ha ka ingbyndi, U Epaphraditos u la kem pang ialade bad u la poi ha ka khep ba u la jan iap. Hynrei kaba sngewtynnad shaphang jong u ka long, ba wat hapdeng kaba kat kata ka jingpang um shym pyrkhat iala ka jong ka jingpang, hynrei u sngewsih lada ki parabangeit kin tip ba u pang bad kin sngewsih na ka bynta jong u, kata kadei kaba pynsngewsih ia u (Philipi 2:26). Bad ka jingsngewkhia jong u ha kata ka por, ka long ba um kwah ba kiba ngeit kin noh mynsiem na ka bynta jong u, kumta u khlem treh ban leit phai sha Philipi, ioh ba ki parabangeit kin noh mynsiem na ka bynta ka jingshitom jong u, namarba u kwah ban ai mynsiem ia ki ba kidei ban iai san ha U Khrist.
Ngi iohi ha U Paul, U Timothy bad U Epaphraditos ia ka bor barieh ba ki lah ban long ka jingaimynsiem ia kiwei, ngi iohi ia ka jinglen lade jong ki, ngi iohi ba ki klet ruh ialade tang namarba kiwei kin ioh mynsiem. Hato ma nga bad ma phi ruh ngi kwah ne em ban long ki Khristan ki ban long ka jingai-mynsiem ia kiwei pat? Kynmaw borabor ba ka tynrai ba ngin ioh mynsiem ne ngin sngewshlur kam wan na ki briew hynrei na U Blei, kumta ka dei ia ngi ban leit sha U Blei borabor ban ioh ia ka jingsngewshlur ne ka jingai-mynsiem na U ba ngin sa lah ban ai mynsiem lem ia kiwei ruh. Bad kynmaw ruh ba dei haba ngi ai mynsiem ia kiwei ba ngi ruh ngi kiew shaphrang ne ngi ioh mynsiem, U Robert Ingersoll uba dei u nongthoh uba na America u ong, “We rise by lifting others” (Ngi san haba ngi rah ia kiwei).
Jingduwai: - “Ah Trai! Nga sngewthuh ba ngam lah ban ai ei ei ia ki briew kiba donkam ia ka jingiarap ka jong nga, hynrei tang kawei kaba nga lah ban ai ka long ka jingai-mynsiem ia ki, aibor ia nga Ah Trai, ba ka jingim ka jong nga kan long ka jingai-mynsiem ia kiba bun.” – Amen.
U Blei Un kyrkhu, Pastor Bidonbok Syiem.
