Devotional (5th July 2020)
Topic (3rd to 9th August 2020) – “Ka Jingkohnguh” (Obedience)
“Te haba u la iohi ia ki, u la ong ia ki, khie leit pyni ia lade ha ki lyngdoh. Ka la jia te ba katba ki dang ialeit, la pynkhuid ia ki.” (Loukas 17:14)
*********************************************************
Haba ngi pule ia ki saw Gospel, ngi iohi ba U Jisu U pynkhiah ia ki briew ha ki rukom bapher bapher, don kiba U shu kren da ka ktien kito kiba pang ki iohkhiah kumba U leh ia u shakri jong u rangbah shispah (Loukas 7:7), don pat kiba U leh ei ei, kum kaba U tah da i sboh khyndew ha ki khmat jong u briew uba matlah bad U phah leit bta ia uto u briew ha ka pung Siloam bad kumta hi uta uba matlah u la iohkhiah (Ioanis 9:6-7). Hynrei ha kane ka jingjia (Loukas 17:11-19) ha ka jingpynkhiah ia ki 10 ngut ki briew kiba pang niangthohlieh, U Jisu U leh kham pher na kaei kaba U ju leh, bad kata ka long ba U shu ong ia ki (Loukas 17:14), “khie leit pyni ia lade ha ki lyngdoh.” Ka long kaba phylla ba U shu phah leit ia ki ban pyni ha ki lyngdoh, namar katkum ka hukum ka jong u Moses kiba pang niangthohlieh ki leit ban pyni sha ki lyngdoh dei haba ki la iohkhiah, bad ki leit ban pyni tang ban shu pyntikna ba ki la iohkhiah na uta u niangthohlieh (Lebitekos 14:1-9). Ka long ruh kaba sngewtynnad haba peit ia kine ki 10 ngut kiba pang niangthohlieh ba ki khlem pynphai nia ia U Jisu ne ki khlem ong, ‘Kumno ngin leit pyni sha ki lyngdoh haba mynta ngim pat khiah, ngi dang don ia une u niangthohlieh, ngin leit sha ki lyngdoh dei haba ngi la iohkhiah bad kata ka long katkum ka hukum.’ Hynrei, ki la shu kohnguh ia kaei kaba U Jisu U ong ia ki ban leh, bad ka jingmih nangta ka long ba ki la mad ia ki jingkyrkhu bad ki la iohkhiah na uta u niangthohlieh. Ong Ka Ktien ka jong U Blei ba katba ki dang leit sha ki lyngdoh la pynkhuid ia ki na uta u niangthohlieh.
Ka long kaba donkam ruh ia ngi ba ngin kohnguh ia Ki Ktien ki jong U Blei kiba U kren ha ngi lyngba Ka Ktien ka jong U, kumba long kine kiba pang niangthohlieh, watla ka long kaba eh ban pyrkhat da ka jingpyrkhat briew kumno kin leit pyni sha ki lyngdoh haba kim pat iohkhiah, pynban haba ki kohnguh ki la ioh mad ia ka jingkyrkhu kaba long ka jingmih na kata ka jingkohnguh ka jong ki. Kan long kumta bad ngi ruh lada ngi kohnguh ia Ka Ktien U Blei khlem pep ngin ioh mad ia ki jingkyrkhu.
Jingduwai: - “Ah Trai, bunsien nga artatien ban kohnguh ia Me khamtam haba ki long pyrshah ia ki jingmut briew ki jong ngi. Nga kyrpad ba men aibor ia nga ba nga lah ban shaniah bad ban kohnguh ban leh tang ia ka mon ka jong Me khnang ba ngan ioh ban mad ia ki jingkyrkhu ki jong Me”-Amen.
U Blei un kyrkhu,
Pastor Bidonbok Syiem
