Devotional (6th July 2020)
Topic (3rd to 9th August 2020) – “Ka Jingkohnguh” (Obedience)
“U Joseph ruh u la leit kiew na Galilaia, na ka shnong Nasaret, sha Judia, sha ka shnong U Dabid, ia kaba la khot Bethlehem (namar ba u long na ka iing-bad na ka jaid U Dabid)” (Loukas 2:4)
*********************************************************
Ka jingkohnguh ia U Blei kam long kaba suk, namarba teng teng haba ngi hap ban leh ia ka mon U Blei bad ban kohnguh ia kaei kaba U Blei U ong ia ngi ban leh ka long pyrshah ia kaei kaba ngi thmu ne ngi kwah. Bad haba ka jingkohnguh kam long kat kum ka jingkwah ka jong ngi bunsien ngi iehnoh wat ia kata kaba ngi dei ban leh.
Ha ka lynnong kaba 2 jong ka Gospel u Loukas, ka iathuh ia ngi shaphang u Joseph bad ka Mari kiba hap ban leit sha Bethlehem na ka bynta ka jingthoh census. Ka por ba kin leit sha Bethlehem kam dei kaba suk ia ki baroh ar ngut namarba ka Mari ka la armet bad ka la jan kha ia u khun jong ka. Ban kohnguh ban leit sha Bethlehem kam dei kaba suk ia ki ha kaba kum kata ka jinglong (condition) namarba ki hap ban iaid da ki phew phew mile ne da ki spah kilometres na Nasaret ban poi sha Bethlehem tang na ka bynta ka jingthoh census. Ka jingleit sha Bethlehem kam dei kaba don ha ka jingmut jong ki hynrei kadei kaba don ha ka jingmut ka jong U Blei, ba lyngba ka jingthoh census, la pyndep ia ka jingthoh ha ka Testament ka barim (Mikah 5:2) ba ia U Nongpynim yn kha ha Bethlehem.
U Blei U khot ia u Joseph bad ia ka Mari ba lyngba jong ka Mari yn kha ia U Nongpynim jong ka pyrthei. Hapdeng ki jingeh kiba kidei ban iaid lyngba, pynban ki la kohnguh ia kaei kaba U Blei u pynbeit ha ka jingim ka jong ki ba ki hap ban leh, bad haba ki kohnguh ia U Blei ki la ioh ban mad ia ki jingkyrkhu haduh ba ki la long ka lynti ba U Nongpynim Un wan longbriew sha kane ka pyrthei. Kane ka long ka jingkhot ia ngi ruh ba ngin kohnguh ia U Blei bad ban leh ia kaei kaba U Blei U thmu ha ka jingim ka jong ngi watla kata ka lah ban nym iadei bad ka jingthmu ne jingpyrkhat jong ngi, hynrei, haba ngi kohgnuh ia U Blei Un iarap ia ngi ba ngin lah ban pyndep ia kaei kaba U Blei U thmu ha ka jingim ka jong ngi.
Jingduwai: - “Ah Trai, iarap ia nga ba nga lah ban kohnguh ia Me bad ban leh tang ia ka mon ka jong Me, ban pyndep ia ka jingthmu ka jong Me lyngba ka jingim ka jong nga watla kadei ia nga ban iaid lyngba ki jingeh kiba bun.” - Amen.
U Blei un kyrkhu,
Pastor Bidonbok Syiem
