Devotional (17th October 2020)
Topic (12th – 18th October 2020) – “Ka jingiaishah” (Patience)
“Te namar kane hi ka daw phi ruh da ka jingleh minot baroh, to phin pynlang ha kata ka jingngeit jong phi ia ka jingbha; te ha kata ka jingbha ia ka jingtip; te ha kata ka jingtip ia ka bor halor lade: te ha kata ka bor halor lade ia ka jingiaishah; te ha kata ka jingiaishah ia ka jingriewblei” (2 Petros 1:5-6)
**************************************
Ka jingiaishah kadei kawei na ki jinglong kiba phim lah ban ioh ne ban don da ka ba shu pule na ki kot, hynrei ka dei ka jinglong kaba ngin ioh da ka jingiaipyrshang, bad kadei kaei kaei kaba ngi hap ban pyrshang bunsien bunsien bad dei haba ngi la mlien ban iaishah kata hi kan sa long doh long snam ha ngi.
Haba ngi la iapeit ha kane ka taiew ia kane ka phang, ‘ka jingiaishah,’ nga shu kynmaw ban peit ia ka jingmut jong kane ka ktien ‘jingiaishah’ ne ‘patience,’ bad nga sngewtynnad ia ka jingbatai (definition) jong ka Webster Dictionary kaba thoh kumne, “Patience: the suffering of afflictions, pain, toil, calamity, provocation or other evil, with a calm, unruffled temper; endurance without murmuring or fretfulness, or a Christian submission to the divine will." (Ka jingiaishah: ka jingshah na ki jingjia ba pynkordit, jingpang, jingtreishitom, jinglanot, jingpynshoi bad kiwei kiwei ki jingsniew, da ka jinglong jai jai, ka jingbymkhih bitar; ka jingiaishah khlem ka jingkhnium ne khlem ka jingialeh pyrshah, lane u khristan uba pyndem ne pynrit ha ka mon kaba kynja Blei).
Haba nga pule ia kane ka jingbatai, ar tylli kiei kiei kiba bat ia ka jingmut jingpyrkhat ka jong nga, kaba nyngkong, "endurance without murmuring" (ka jingiaineh ne jingiaishah khlem ka jingkhnium). Ka long kaba eh bha ban nym khnium haba kiei kiei kim long kum kiba ngi pyrkhat ne kwah. Bun bha ki briew ha kine ki sngi ki khnium khamtam haba ki niah ia ki kali, ymdei tang ia ka traffic jam, hynrei ki khnium haba ki iohi ba kiwei ki niah kali khlem akor. U don uwei u paralok jong nga uba ong, ‘u bym khnium haba niah kali khamtam ha Shillong uta u la dei u khristan uba shisha.’ Sngew thamula ia kata ka jingkren, hynrei ka long pat kaba shisha, dei haba ngi niah ia ki kali ki jong ngi ba wat ngi ki Khristan ruh ngi shah tynjuh ban long kiba iaishah, namar baroh ngi khnium haba kiei kiei kim long kum kiba ngi kwah. Bad dei hangne ba ka jingiaishah ka long kaba donkam, tangba haba ngi iaishah ryngkat bad ka jingkhnium kata ruh kam long kaba don jingmut, haba ngi ong ba ngi iaishah, ngim dei ruh ban khnium.
Kaba ar, kaba nga sngewtynnad na kane ka jingbatai ka long, “a Christian submission to the divine will” (Ka jingpynrit ne ka jingpyndem u Khristan ha ka mon kaba kynja Blei). Katno sien ma nga bad ma phi ngi don ne poi ha ki jingjia ne jinglong kiba pynbor ia ngi ba ngin pyndem ia ka mon ka jong ngi ha ka mon ka jong Uta Uba donbor baroh, bad kiba kum kita ki jingjia ki pynbor ia ngi ba ngin long kiba iaishah. Ka jingkylli kaba nga kwah ban kylli ka long, Hato phi shah tynjuh ha kane ka sngi ban long uba iaishah? Lada phi shah tynjuh ban long kiba iaishah phi dei ban ainguh ia U Blei, namarba U Blei U phrang ia phi ba phin ioh mad ia kata ka jingieit kaba shisha ka jong U, namarba ka jingieit kaba shisha ne ka jingieit kaba kynja Blei kadei ka jingieit kaba iaishahslem (1 Korinth 13:4).
Jingduwai: - “Ah U Blei iarap ia nga ba ha ki por baroh ngan iai pyndem ia ka mon ka jong nga ha ka mon ka jong Me, aibor ruh ia nga ba ngan iaishah watla kiei kiei kim long kumba nga kwah, iarap ia nga ba ngan tip ba kiei kiei kiba Me pyrkhat shaphang jong nga ki long kiba bha.”- Amen.
U Blei Un kyrkhu, Pastor Bidonbok Syiem.
