Devotional (9th November 2020)
Topic (8th – 15th November 2020) – “Ka Jingjop” (Victory)
“Ynda kumta U Trai Un mih, bad Un ialeh ia kita ki jaid bynriew, kumba U la ialeh ha kata ka sngi ka jingialehthma.” (Sekharaiah 14:3)
**************************************
Ka phang ia kaba ngin ia peit ha kane ka taiew (9th - 15th November, 2020) ka long shaphang, “Ka Jingjop” (Victory). Kum kiba ngeit ngi don ha ka thma man ka sngi, ki jingpynshoi bad ki bor jong kane ka pyrthei ki ringpah ia ngi man ka sngi, ka long kaba donkam ia ngi ba ngin im ka jingim kaba jop. Kumta kane ka phang (topic) kan iarap ia ngi ban sngewthuh ba dei tang ha U Blei ba ngi lah ban ioh ia ka jingjop ha ka jingim ka jong ngi kaba manla ka sngi.
La iathuh ba ka 9 tarik jong u bnai May manla u snem ha Russia ia kaba la tip mynshwa kum ka Soviet Union ki ju khot ia kane ka sngi ka V-Day ne ka Victory- Day, bad ha kane ka sngi naduh ki office, ki skul, ki kolej ki ioh shuti bad ki heh shipai ki ju ai ia ki jingkren, la ju tem ia ki jingrwai ieit ri (patriotic songs) ka don ka jingiaid parade ka jong ki shipai bad ka jingthang ia ki bom pataka (fireworks). Bad haba pyrkhat shisha ia ka, ki shipai jong ka Russia bad kiwei kiwei ruh ki shipai kiba la shah shitom ha ka thma bah kaba ar, da ki million ki shipai ki la iap ha kane ka thma ha ka jingiap kaba shyrkhei, ngin sa sngewthuh ba kane ka V-Day jong ki nong Russia ka don hok ia ki ba kin leh kmen namar hadien kaba kat kata ka jingialeh ki ioh ia ka jingjop hadien bun ki jingshitom ba ki la dei ban shah.
Kum kiba ngeit ka V-Day ka jong ngi ka dei ban long man ka sngi, ka sngi jong ka jingjop ka dei ban long man ka sngi lada ngi la nang ban aiti ia ka jingialeh ka jong ngi ha U Blei. Ki bor ki jong u soitan ki ialeh ia ka jingim ka jong ngi kiba ngeit man la ka sngi, bad ha kine ki sngi kiba khatduh ngi iohi ba ka jingialeh ka long kaba shyrkhei, hynrei ngi tip ba U Jisu Un sa ialam ia ki kynhun shipai jong ka bneng Un wan ban pynjot noh thiaw ia uta u bymman (Jingpynpaw 19:14). U Jisu kumba U la jop ia u soitan halor ka diengphna da ka jingiap bad da ka jingmihpat ka jong U, Un jop ruh ha ka thma haba Un pynjot noh thiaw ia uta u bymman. Ngim tip lano kata kan jia hynrei ngi sngewskhem haba ngi don ha ka liang ka jong U Blei Un pyllait im ia ngi na kita ki jingialeh bad ngin ioh long kiba jop. Kane ka jingiathuh lypa jong U Sekharaiah, ka iathuh ba U Blei Un sa pynjot ia ki jaitbynriew bad Un ialeh na ka bynta ka Jerusalem kumba ha ka jingialehthma bad Un pynjot ia ki nongshun jong ka baroh (Sekharaiah 14:3). Ki parabangeit baieit, hapdeng ki jingialeh kiba bun kiba u soitan u ialeh ia ngi, hynrei ngin ieng kum ki nongjop namarba U Blei Un ialeh na ka bynta jong ngi, ka donkam ia ngi tang ba ngin aiti ha U Blei ia kata ka jingialeh.
Jingduwai: - “Ah U Blei, hapdeng ki jingialeh kiba bun kiba nga don man ka sngi hynrei nga don ka jingshlur bad ngam shepteing namarba nga tip ba Men ialeh na ka bynta jong nga, iarap ia nga ba nga lah ban aiti ia kane ka jingialeh ka jong nga ha Me.” - Amen
U Blei Un kyrkhu, Pastor Bidonbok Syiem.
