Die rand het hierdie week op sy sterktste vlak sedert die begin van 2019 verhandel en Woensdagaand op R13,50 teen die dollar gestaan. Of die rand versterk, of die dollar verswak, is soos die twee lemme van ʼn skêr en mens is nie seker watter een die snywerk doen nie. Dit is dus moeilik om dag-tot-dag veranderinge in die wisselkoers te verklaar, maar mens kan na grotere kragte kyk wat die vraag na rand kan laat toeneem.
