ദീപാവലീ ചിന്തനം
മെഴുകുതിരി കത്തുന്നതിനെ സംബന്ധിക്കുന്ന ഒരു ദാർശനിക നിരീക്ഷണം കേട്ടിട്ടുണ്ട് -:
' കത്തുക എന്ന പക്രിയ, കെട്ടുപോവാനുള്ള സ്വാഭാവിക പ്രവണതയെ പ്രതിരോധിക്കലാകുന്നുവത്രെ ' ജീവിതത്തെ ഈ നിരീക്ഷത്തോട് അന്വയിച്ചു പറയാറുണ്ട്.
മരിക്കാനുള്ള പ്രവണതയെ പ്രതിരോധിച്ചു കൊണ്ടാണ് നാം ജീവിക്കുന്നതത്രേ.
അപരിമേയമായ (അതിരറ്റ ) ആത്മതത്ത്വം ഒരു ശരീരത്തിലേക്ക് അനുപ്രവേശിച്ച് പ്രകാശിക്കുമ്പോൾ അത് ജീവാത്മാവായി സംഭവിക്കുന്നു. (തത് സൃഷ്ട്വാ തദേവാനുപ്രാവിശത്- ഇത് ജീവാത്മാവിനെക്കുറിച്ചുള്ള ഔപനിഷദിക പാഠമാണ്.) അതു കൊണ്ട് തീർച്ചയായും ജീവാത്മാവിന് പരിമിതിയെ സംബന്ധിക്കുന്ന നിരന്തര പരാതി അനുഭവപ്പെടും.
ജീവാത്മാവിന്റെ (എന്റെ ) വിവിധ പരാതികൾക്കു പിറകിൽ, അപരിമേയതയ്ക്ക് ഏർപ്പെട്ട പരിമിതിയെ സംബന്ധിക്കുന്ന വ്യഥ ഉണ്ടെന്നു സാരം.
പരിമിതികളോട് പിരിതപിച്ചും, പോരടിച്ചും ജീവിതം ഒരു നിരന്തര അലോസരമാക്കി തുലയ്ക്കുന്നു എന്നതാണ് പൊതുവെ നമ്മുടെ ഇന്നത്തെ അവസ്ഥ. എന്നാൽ വീക്ഷണം മറ്റൊരു തരത്തിലായാലോ?
അതായത് :-
ദേഹം തുടങ്ങിയ ഉപാധികൾ എന്നെ പരിമിതപ്പെടുത്തുന്നില്ലെന്ന ചിന്ത ഉണർത്തി നിർത്താൻ ഉത്സാഹിക്കുക. ദേഹാദികൾ എന്നിലെ ( ജീവാത്മാവിന്റെ ) അനന്ത സർഗ്ഗശേഷികൾ അനാവരണം ചെയ്ത് പ്രകാശിപ്പിക്കാനുള്ള മാധ്യമമാണെന്ന ബോധ്യം കൈവരിക്കുക.
ഒരു വാദ്യോപകരണത്തിൽ നിന്ന് ശുദ്ധ സംഗീതവും, താളവും പുറത്ത് കൊണ്ടുവരാൻ അക്കാര്യത്തിൽ നൈപുണ്യമുള്ളവർക്ക് സാധിക്കും. ഇതു പോലെ ശരീരം ഉപയോഗിച്ച് ആത്മാവിൽ നിഹിതമായ സംഗീതം, നൃത്തം, തുടങ്ങി ബഹുവിധ സർഗ്ഗശേഷികൾ ആവിഷ്ക്കരിക്കാൻ അതാത് മേഖലകളിൽ വൈദഗ്ധ്യം നേടിയവർക്ക് സാധിക്കേണ്ടതാണ്.. അങ്ങിനെയാവുമ്പോൾ ജീവിതം, പരാതി നിറഞ്ഞ പോരാട്ടത്തിന്റെ ചരിത്രമാവില്ല. പ്രത്യുത സുശോഭന ഭാവനകളുടെ ആവിഷ്ക്കാരോത്സവമാവും.
പൊടുന്നനെയുള്ള പൊട്ടിത്തെറികളും പ്രതികരണങ്ങളും പോരാട്ടത്തിന്റെ പ്രകടനമാണ്. അസഹിഷ്ണുതകളുടെ ആവിഷ്ക്കാരങ്ങളാണ് .
അവധാനതാപൂർണ്ണം ചെയ്യുന്ന ധ്യാന ധന്യ പ്രതികരണം മാതൃകാപരമായിരിക്കും. അവരവർക്കും, അന്യർക്കും അത് ആശ്വാസം പ്രദാനം ചെയ്യും.
പ്രതികരണ വിഷയകമായ ചിന്തയും, വാക്കും, ചെയ്തിയും അസഹിഷ്ണുതയുടെയും പ്രതികാര പ്രകടനത്തിന്റേയും ഭാഗമായാൽ അവരവർക്കും, മറ്റുള്ളവർക്കും അതൊരു വലിയ ശല്യമായി മാറുകയേയുള്ളൂ. എന്റെ പ്രതികരണങ്ങൾ എന്റെ സർഗ്ഗശേഷീ പ്രകടനങ്ങൾക്കും, എനിക്കും മറ്റുള്ളവർക്കും സൗഖ്യവും ശാന്തിയും പ്രദാനം ചെയ്യുന്നതിനും (ലക്ഷ്യം ) ആവണമെന്ന ആരോഗ്യകരമായ നിഷ്ഠ പുലർത്തുന്നത് ആദരണീയമാണ്.
കുടുംബ ജീവിതത്തിൽ പൊട്ടിത്തെറികൾക്ക് ന്യായവും അവസരവും ഉണ്ടായേക്കാം. എന്നാൽ ദൂരക്കാഴ്ചയോടെ, ലക്ഷ്യബോധത്തോടെ പ്രതികരണങ്ങളെ ആസൂത്രണം ചെയ്യാൻ ഏവർക്കും സാധിക്കും. ഈ വിഷയത്തിൽ കുട്ടികൾക്ക് മാതൃകാപരമായ പരിശീലനം നൽകാൻ മാതാപിതാക്കളും, മുതിർന്നവർക്കും സാധിച്ചാൽ അത് ആശ്വാസ ദീപം കൊളുത്തലാവും.. ഏവരും ഈ ശൈലി വിവേകപൂർവ്വം അറിഞ്ഞ്, സ്വാംശീകരിച്ച് ജീവിതത്തിൽ പ്രാവർത്തികമാക്കിയാൽ കുടുംബത്തിലും, സമാജത്തിലും ആനന്ദ ദീപാവലി നിത്യ സംഭവമാവും...
ദീപാവലി ആശംസകൾ
പ്രേമാദരപൂർവ്വം,
സ്വാമി അദ്ധ്യാത്മാനന്ദ.
