GUEST: Vim Nadera
Si Victor Emmanuel Carmelo Daelo Nadera, Jr. ay isang propesor sa Unibersidad ng Pilipinas sa Diliman kung saan siya nagtapos ng Ph.D. Philippine Studies at naglingkod bilang Direktor ng Likhaan: U.P. Institute of Creative Writing. Kinuha niya sa Unibersidad ng Santo Tomas ang B.S. at M.A. Psychology na tesis niya ay Poetry Therapy na naghanda sa kaniya upang maging isang expressive arts therapist sa mga pasyenteng maykanser, may A.I.D.S., gumagamit ng bawal na gamot, batang lansangan, “comfort women,” at iba pang biktima ng abuso, kalamidad, at lumbay.
Itinatag nila ng kaniyang asawang si Dinah noong 2009 ang Foundation A.W.I.T. o Advancing Wellness, Instruction, and Talents makaraang pumanaw ang kanilang pangatlong anak na si Awit noong 2006 kung kailan ang kaniyang librong Poetreat: The Use of Poetry as a Therapy in Mutual Support Groups of Cancer Survivors in Metro Manila ay inilabas ng UST Publishing House.
Sa Department of English and Comparative Literature, pinagturo siya ng Performance Poetry sa imbitasyon ni Dr. Cristina Pantoja Hidalgo. Kaya, mula 1995 hanggang 2005, nakabuo siya ng maraming grupong nagtatanghal ng tula taon-taon pero kinalaunan, siya ay naging bahagi ng Departamento ng Filipino at Panitikan ng Pilipinas mula noong 1995 hanggang ngayong pinagtuturo siya ng Trauma at Malikhaing Pagsulat.
Samahan ako sa isa na namang makabuluhang talakayan sa panitikan, wika, at panulaan kasama ang isa sa mga propesor ko sa MA sa UP Diliman, at kapwa manunulat na si Dr. Vim Nadera!
