新疆克孜爾到依家仲有好多佛教洞窟，有啲洞穴仲早過敦煌。克孜爾石窟入面嘅壁畫有個特點，就係壁畫係直接傳承自古天竺，所以無漢化痕跡，入面嘅飛天造型拙樸，有啲仲隱約見到膊頭上面有翼，同後期漢化飛天嘅飄帶祥雲好唔同。
雖然今時今日，從世界地圖一望，會覺得新疆同印度距離好遠，加上之間具有高山險阻，大河阻隔，沙海橫亙，烈日暴雪，但唔好忘記，當年人類為咗商業、為咗信仰，喺荒漠間會走出條漫長嘅路。
於是，從喀什米爾、阿富汗、巴基斯坦到新彊，構成古代嘅絲綢之路——從大山同荒漠間靠綠洲連繫起來嘅一串鏈狀道路，作為商人嘅富貴險途，信仰者嘅宗教歷練。
克孜爾（今日新疆嘅庫車綠洲）就係其中一個中途站，喺古代，佢就叫做龜茲國，位於塔克拉瑪干沙漠北岸，嗰度商販雲集，經濟繁榮。呢個安逸嘅綠洲，四周都係險阻，隨時會有天災人禍。
旅行者經過一重又一重嘅難關，冒住財物失去，性命不保嘅風險，終於抵達呢個小國，得到一夕安寢。
但旅行者亦會從風聞嘅故事知道，呢個小國歷來受四周強大敵人嘅侵擾，柔然、嚈噠、匈奴，都曾經控制過呢個地區。
今集，我哋要講嘅人物，同龜茲國有莫大嘅關係，佢嘅人生，決定咗龜茲國嘅滅亡。
提提你，我哋計埋會員podcast，已經用印順法師講過五集《心經》入門知識，有興趣記得去聽。
