gae baras ki id ka din kya achchha tha
chand ko dekh ke us ka chehra dekha tha
faza mein 'keats' ke lahje ki narmahaT thi
mausam apne rang mein 'faiz' ka misra tha
dua ke be-awaz uluhi lamhon mein
wo lamha bhi kitna dilkash lamha tha
hath uTha kar jab aaankhon hi aaankhon mein
us ne mujh ko apne rab se manga tha
phir mere chehre ko hathon mein le kar
kitne pyar se mera matha chuma tha!
hawa! kuchh aaj ki shab ka bhi ahwal suna
kya wo apni chhat par aaj akela tha?
ya koi mere jaisi sath thi aur us ne
chand ko dekh ke us ka chehra dekha tha?
-Parveen Shakir
Music: Baghon mein by Arooj Aftab
