Gembala Menyapa
4 Februari 2023
NGLUWARI BUDAYA KONSUMTIF
Para Hakim 6:11-24
Sinten ingkang dereng tepang kaliyan Artidjo Alkostar? Artidjo Alkostar punika satunggaling hakim ing Indonesia ingkang misuwur krana tumindakipun ingkang teges, pener, lan leres. Hakim Artidjo punika manahipun resik saking suapan para koruptor, mboten mempan dipun sogok arta, gesang padintenanipun tebih saking kemewahan. Piyambakipun punika dipun tepang minangka hakim ingkang kendel (berani) anggenipun numpes para koruptor, ngantos piyambakipun kasebat hakim agung. Sipat lan karakter ingkang kados mekaten punika ndadosaken para koruptor ajrih dhateng Artidjo. Ing salah satunggaling buku “Kisah-kisah Teladan Kesederhanaan Tokoh Bangsa”, kacariosaken bilih Artidjo punika hakim ingkang tumindak adil ing kabeneran, kabukti Artidjo saged ngadili lan mutusaken 19.708 prekawis hukum, ngantos piyambakipun kasebat “malaekat maut” kangge para koruptor. Sedaya ingkang dipun lampahi Artidjo kados mekaten punika, namung setunggal alesanipun, inggih punika supados Artidjo saged mangsuli tanggeljawabipun dhumateng Gusti nalika ing akhirat.
Waosan kita wekdal punika nyariosaken bangsa Israel ingkang dipun tindhes dening bangsa Midian, karana tumindak dosa dhumateng Gusti Allah. Bangsa Israel ngabekti dhateng allahipun tiyang Amori (Brahala). Karana punika Gusti Allah ngukum bangsa Israel ngantos 7 taun dados jajahanipun bangsa Midian. Selajengipun bangsa Israel sesambat dhumateng Gusti Allah, lajeng Gusti Allah ngutus Gideon kangge ngluwari bangsa Israel. Kasebataken bilih Gideon punika satunggaling hakim utusanipun Allah kangge ngluwari bangsa Israel saking panindhesipun bangsa Midian. Senaosa Gideon rumaos taksih alit lan taksih timur, punika mboten dados pambengan anggenipun Gusti Allah miji piyambakipun dados hakim. Gusti Allah paring prajanji badhe ngreksa lan nunggil Gideon nindakaken ayahanipun mujudaken pangluwaran bangsa Israel.
Ing wekdal punika, kita kaajak sesarengan dados umat-Ipun Gusti ingkang saged paring pangluwaran, contonipun: ngluwari pola pikir menawi wit-witan, toya, udara punika mboten namung dados barang konsumtif, ananging kedah dipun upadi, satemah saged lestantun. Kita ngluwari pemanggih kita bab alam bilih alam punika mboten namung kita ginaaken kangge nyekapi kabetahan konsumtif kita kemawon, ananging alam punika saged ta dados rencang gesang di jagad punika. Mangga kita rimati lan nglesatriaken alam punika, satemah anak putu kita saged ngraosaken gesang kanthi sae.
