“Se te esforzas e es disciplinada, conseguirás todo o que te propoñas!”. Xa nos gustaría que este lema funcionase sempre!
Buscamos desesperadamente técnicas, métodos ou instrucións que nos garantan que se facemos A, o resultado vai ser B; pero na Vida aparecen variables que non dependen para nada de nós e que modifican os acontecementos dunha maneira inesperada.
Está claro que para nadar hai que meterse na auga, mais até que punto nos convertemos en mergulladoras dependentes de fórmulas exactas que prometen resultados asegurados?
Non estou a dicir que esforzarnos non valla para nada, o que digo é que a nosa idea do que é esforzo implica toneladas de rixidez e de expectativas que nos frustran e nos embuten.
Se a disciplina quere dicir ser cegamente obediente a normas dadas polas demais, hai un compoñente de obrigatoriedade, de anulación, de represión e de submisión e iso atenta contra o noso ser máis íntimo e esencial.
