Description

2022.10.09發佈- 全文請至IG: tipsy.podcast 觀看。

醉住廣播tipsy.podcast，中文名曾經叫做「醉住洗杯」，英文名就無改過嘅。

呢個podcast將會同大家一齊聽下社會入面嘅非主流文化。

會有最多見到嘅，係平時主持生活上嘅體驗，思考，睇過嘅作品，前人嘅理論而得黎嘅集數；

有時會有外傳，一d又無內容又聽到好眼訓嘅集數；

亦有極少出現，讀一段詩，讀一篇文章，有感而發嘅集數。

而每一集都會同大家開支酒，希望聽眾聽嘅時候都為自己準備一杯野飲。

呢個podcast嘅內容並唔會同大家講一d好創新好尖端嘅野，我所做嘅只係同你一齊用心去感受呢個世界，一齊去喚醒你內腦入面深處嘅回憶。

所以喺一切開始之前，我地黎一齊從心同埋腦，兩種角度去了解「自我」係啲咩野。

-

今日呢集序章，跟從笛卡兒一方，以及佛洛依德一方 兩個截然不同嘅想法去了解何謂我，何謂自身。

認識自我向來都係哲學上嘅一大課題。

去嘗試理解自己就係同時於去嘗試理解世界。

世界並唔一定係只可以從客觀方式去理解。

唯心主義講嘅係以心智為基礎去理解世界，

人的意識是萬物的根源以及物質現象發生的先決條件，

根據這個觀點，意識作為物質存在的前提是存在於物質之前的。

而我地人嘅觀點，想法，就會影響呢個世界事物嘅性質。

-

我地嘅自我意志會影響物質嘅定義。

但係又係咩野去定義自我嘅呢?

-

一個十分著名嘅法國哲學家 - 笛卡兒

最出名嘅係一句大家必定會聽過嘅：

「我思故我在」。

笛卡兒作為一個提出懷疑論嘅人，

認為世界並唔可以肯定，一切都可以懷疑，可以係惡魔所瞞騙我地嘅一場夢。

而唯一可以肯定嘅，就係思考緊嘅自己

-

笛卡兒用「二元論」去分開呢個意識同外在世界做「認知主體」同「被認知嘅客體」：

作為「認知主體」嘅意識係純粹思維，具有直觀和判斷的能力，我就先用理性呢2個字去借代；

而客體就係一種存在喺物質世界佔有空間嘅野，

因為人嘅肉體，感官係可以被意識左右同瞞騙，所以我地嘅身體都被區分為客體object。

而從呢個二元論裡面，笛卡兒除左將我地嘅意識同肉身，世界分割開之外。

佢之後亦都有意將佢地排列優次，

認為人嘅思想，理性嘅意識係優於我地嘅肉體。

然後就延伸到，

佢認為人嘅行動，係完全由我地嘅理性控制，

理性係控製我地行動嘅根據。

-

但係咪真係咁呢?

理性，或者叫意識係咪就真係我地所有行動同諗法嘅起點呢?

-

佛洛依德同尼采認為：

我地嘅行動並唔係全部受意識控制，當中係由潛意識去掌控。

咁呢啲潛意識，或者叫做直覺本能係點黎嘅呢?

佛洛依德就話：係我地嘅回憶堆砌出我地嘅潛意識

即係可以話係我地嘅過去，形成現在嘅我地

可能係一次年幼，童年時候嘅經驗，就影響住我地嘅一生。

我地嘅心靈係無得同身體反應切割分開去睇嘅。

而就係呢啲一件件過去嘅重要經歷，令而家呢一刻嘅我地面對一啲dejavu 一啲似曾相識嘅處境。

就會好直覺咁本能作出反應。而呢一種直覺，我地係唔應該喺理解自我嘅時候擺喺理性之後，而係應該平等看待嘅。

-

最後，同大家講下我地要點樣運用呢2種力量，再去平衡兩者。

-

如果係一段美好嘅記憶，就自然會俾我地力量，當然要好好記住。

而如果係一件，或者講係一連串唔好，但依然重要嘅經歷，

仍然請你好好記住。

只係我地要記住嘅唔係嗰件事情，而係嗰段感受。

好好思考呢一份焦慮以及驚慌嘅感覺，

將佢轉化為憤怒，再將佢昇華做一份希望，

一份唔想再遭遇呢個恐懼嘅希望。

等你嘅身體去記住，

等你個心去記住，而唔係用你嘅理智同思緒。

-

另一方面，我地可以從過去之中得到行動嘅動力本能。

但唔代表我地一定要俾過去束縛。

當痛苦嘅過去唔能夠轉化成為力量，而係成為束縛住我地行動嘅泥沼。

喺呢個時候就要運用我地嘅意識理性去截斷來自過去嘅幽魂纏繞。

喺呢度嘅並唔係可恥嘅逃避，而係帶有勇氣嘅同過去幽魂砍斷連結嘅行為。

-

無論係直覺定係理性，都可以同時使用，將身體交俾直覺，然後將心靈付託俾理性。

-

序章嘅時間黎到呢度

鍾意啱啱內容既可以follow 呢個podcast 同ig, ig會有更多無錄做podcast嘅短文同埋酒嘅介紹。

聽完今集亦推薦大家可以先去聽下第一季嘅集數 ，只要碌到去時間最早嘅集數就會搵到。

第一季會繼續同大家去了解自我，以及喺一個荒謬嘅空間以及無意義嘅時間入面點樣去拯救自己。

呢度係tipsy podcast，希望之後嘅集數仍然會聽到你地