2022.10.24發佈- 全文請至IG: tipsy.podcast 觀看。
歌單： 已因版權刪去(2026 Jan)
主題：「四大終極關懷」
有興趣嘅聽眾可以睇睇以下4本書：
酒徒；
異鄉人；
過於喧鬧的孤獨；
存在主義心理治療。
以及一句話總結今集：
我地要承認世間不幸的本質，然後以主觀的反抗賦予意義。
-
內容補回
-今集首先用小說-酒徒，以及 異鄉人做開頭，同大家講下存在主義的文學小說入面經常會提到的並非人與人之間的人際孤獨，更多的是人和自己內心衝突的人心孤獨。
亦同大家提到(酒徒)書入面的主角以酗酒的行為上的放縱作為麻醉人心孤獨的心理防衛機制。我地發展心理防衛的起因之一係內心渴望與現實處境有落差。咁係咪只要「山不轉，人轉」，降低自身對自己的要求就可以唔(行為及內心上)墮落呢?
唔係，因為「要求/渴望」除左來自自身，亦有來自他人。沙特「他人即地獄」的說法就係講正因每個人都有自己的渴求，所以不同的願望必定會互相衝突。所以才有沙特如此說法。(異鄉人)書入面的主角更因脫離社會準則特立獨行而被判死刑。
但提到存在主義的書最最最核心想講，兩本書都透過瀕死或死亡來同大家講人和世間之間的存在孤獨。而Irvin Yalom嘅存在主義心理治療入面，講到人類反思自己嘅處境嗰陣自然會涉足嘅四種終極關懷，存在孤獨甚至只係其中一個題目，而其餘3個題目，係死亡，自由，無意義。今集想探討上面4個終極關懷，同埋如何從中得到救贖。
-
(而提一提我自己的自救方法係創作，過於喧鬧的孤獨入面，引用一句「唯有粉碎自身，才能釋出精華」。而創作就係一項不斷自我粉碎，然後重塑自己的行動。)
-
(以下為簡略版，詳細請聽podcast 內容)
死亡：
可參考翻之前海德格 - 向死而生嗰集。簡單講就係死亡有其不可替代性，我地無泓體驗他人的死亡，死亡係最為孤獨的體驗。而人生來有向生的衝動而刻意忽視死亡的必然性。結果就係人有一種死亡焦慮，不去正面體會死亡終將到來的事實。而生命亦因忽略死亡是生命一部分而失彩。
而存在主義心理治療書中提到曾經有瀕死經驗的人會過出更精彩的人生，因為他們深刻知道生命有限。我地亦可以透過一個簡單方法，將無形的死亡焦慮帶入現實，從有形的方式正面恐懼，然後跨過去。方法只需在紙上畫上一條橫線，線的一端代表生命起點-出生，另一端是生命終點-死亡，然後喺線上面點一點，點嘅位置要等同你自認為的壽命。咁樣就能夠以一個更直接的方式理解到生命的有限。
擁抱死亡就係面對生命的最好方法。
-
自由：
自由並非直接為人帶來負擔，而是當人有自由選擇的時候，就需要同時為自己的選擇負起責任。而這份責任的焦慮先係壓垮人的重擔。更有一個講法係「被暴君統治比沒有君主好」。有部分人會拒絕為自己而生存，因為自己幫自己做選擇意味住可以為行動嘅結果承擔責任嘅都只有自己。佢地亦都無藉口去將失敗的責任推俾暴君同其他人。面對自由的焦慮，我地的方法就係：要承認自己的不幸是自己做成，無其他人需要同可以為我地自己負責。直接面對責任就係面對自由焦慮的最佳方法。
Podcast入面有提及「不能鈴」，心理治療師當聽到求診者提到佢地「不能夠」作出行動同改變嘅時候，心理治療師會糾正佢，要求佢將「不能夠」改做「不願意」。惟需要留意喺面對責任的問題的時候，人會有好大嘅內心偏見，始終需要他人觀察以及指明先更大可能改變自己。所以有需求都係尋找專業人士會更佳。重申一次，要認清責任和選擇權都在自己身上，即使係失敗的你都係你，只有呢一刻，呢一度嘅你係唯一嘅你，先可以逃離自由的焦慮勇敢為自己作主。
-
孤獨：
呢度唔係講人同人之間嘅人際孤獨，或者人同自己內心的人心孤獨，而係人同世界之間的存在孤獨。
海德格用「被拋入」黎形容人「未經同意被拋進自己無法選擇的存在的世界」。呢一個世界係無意義而荒謬的，每個人就如同身處喺名為存在的海洋之中的一個個孤獨的小船，而呢個無根，又無垠的海洋根本唔存在我地可以停靠的海岸。
保護自己免受終極孤獨的方法係建立有價值的關係。有人毅然接納自己的孤獨，亦有人會選擇投身到他人的關係。呢啲關係當然唔能夠打敗孤獨，而只係彌補孤獨所帶黎嘅痛苦，因為我地同世間的脫離係一件改變唔到嘅事。
咁咩先叫做有價值的關係呢?
一段關係有分為接受孤獨之下的關係同 為左逃避孤獨的關係：
前者毅然面對孤獨的存在，然後將情感轉向他人，透過關愛他人去拯救自己。後者係出於對孤獨的恐懼，藉住成為他人一部分以及用他人作為工具去令自己可以逃離孤獨。前者才是有價值，成熟的愛。
書入面提到成熟的關係有幾種特點，都圍繞住一個準則，就係「無所求的愛」。成熟的關係，唔會強求對方，因為愛並非無所不能，所有關係都存在限制，總有一日，你所要求的對方俾唔到你。咁我地要點樣裝備自己去成就一段成熟而不問回報的愛情呢?
我只可以用一句說話作為存在孤獨的總結：
來自弗洛姆的「愛的藝術」 - 「孤獨的能力就是愛人能力的先決條件」。
我地真正體會自己係同他人分離，更重要係同世間脫離的時候，要自愛，然後先能夠真正去愛人。
-
無意義：
人嘅思考本身就係不斷尋找一種模式去理解同解決一件事，亦同時係一個直線思考模式，所以當我地要面對嘅係一個毫無邏輯，無情而又冷漠的世界嗰陣。就好自然感到不安而會好想去尋求一個模式去理解呢個世界，我地渴求意義，所以無意義的時候會不安。
因為字數所限要草草完結，但此部分的面對無意義的方法及態度先係整本書，不，是整個人類族群都要知道的重點 – 反抗。宇宙的確無意義，而宇宙終結的時候所有事物都係「無」，所以人會認為一切不是永恆的存在都無意義，因為終將「唔存在」。但「唔存在」是否等同「唔值得存在」呢? 我們創造的回憶，關係都係有價值的，而價值係可以超越死亡的。即使再退一步我地面對嘅唔止係死亡而係宇宙的最終極結束，而價值亦唔係永恆，我地仍然面對呢種命運的時候以反抗的姿勢面對一切，而呢種反抗的態度，就會係意義所在。
-
簡單總結：
我地接納同承認以上頭三種處境：
接受死亡的意義；
承認自己要為自己人生所負責；
接受與世界之間的孤獨，
但最終我地面對宇宙最終極的無意義，就需要高傲的反抗。
一切意義都係主觀賦予的，我地要反抗虛無。
-
我地要承認世間不幸的本質，然後以主觀的反抗賦予意義。
-
完
