Zip噏劇場 《Game of Eden》第二季 小島篇 第29回
時間：180年9月10日早上11時，即村民大會前2小時
地點：封閉區域Area DB Island 東堤，凱安家中
*敲門聲效
*開門聲效
凱安：阿雪，你嚟得係時候啦，因為我啱啱煲好咗湯！
裘雪：又係嗰款大補湯啊？
凱安：唔係嗰款大補湯！係玄武補身湯！我用咗靈龜同海蛇燉足3日架！
裘雪：但你知我嗰答案架…
凱安：當年玄武大帝騎住龜蛇神獸，決戰深海嘅九頭海蛇，成功將佢封印，我哋一族先可以平安活到今日。嚟啦，為咗今日，同我飲咗佢。
裘雪：雖然蛇可以驅風去濕同舒筋活絡，而龜係滋陰補腎同健骨，但你唔係真係認為飲咗可以得到玄武大帝嘅能力嘛？
凱安：飲咗未必有，但唔飲就定無。點解唔去嘗試一下。
裘雪：所以，一陣間你真係會挑戰阿綠村長之位？
凱安：錯啦，唔係挑戰，而係搵出真相。你哋一族不斷占天觀星，唔係都係想求真咩？
裘雪：咁…你想智取定武奪？
凱安：我用邊一種方法會得到你支持嘅，我就揀嗰種。
裘雪：但無論邊一種方法，都會動搖到呢180年嚟啞鈴洲嘅傳統同根基…
凱安：咁好簡單啫，只要玄武大帝顯靈，就可以安撫民心。我唔係嚮往做村長，而只係呢個係全村唯一嘅方法。
裘雪：如果武鬥，你知成條村得阿葦可以同你一戰，以阿綠嘅實力一定輸比你…
凱安：我知。所以如果用武鬥，就會被其他村民話我勝之不武。當我成為村長，都只會產生更多嘅風波。
裘雪：所以，你選擇智取？
凱安：唔係我一個人嘅智力，而係全個啞鈴洲村民嘅智慧。我相信大家會為啞鈴洲選取一個更合適嘅未來。
裘雪：即係…你想喺村民大會動議全民投票，選出村長？
凱安：盧氏、凱氏、裘氏家族每族都有百多人，如果你可以說服到裘氏嘅族人，我同你就可以求得真相。
裘雪：但咁做…有機會分化村民…
凱安：我哋都係為咗啞鈴洲嘅未來，我相信可以做到和而不同。
裘雪：咁樣會唔會太過理想主義呢…
凱安：咁，我唯有武奪啦。
裘雪：你知我最唔想見到呢個結果架…
凱安：我知。咁…你有冇更好嘅方法？更重要係你嗰心點諗。
裘雪：阿安，放心。當阿綠請示完玄武大帝，開村民大會嘅時候，我就會比我呢一族嘅答案大家。
凱安：咁…阿雪…你應承我，就算一陣發生咩事都好，我、你同阿綠都係一世嘅朋友。
裘雪：得啦，你呢啲咁肉麻嘅說話，仲難頂過碗大補湯啊。
裘雪：（讀白）我地裘氏一族承繼千里眼嘅能力，多年以嚟都依山而居。因為山勢高，係遠觀北帝星最佳位置。我哋因為玄武大帝會再次回歸呢一句說話，180年嚟不斷觀察同研究星像，希望推算佢回歸之日。雖然日子未確實推斷到，不過，我哋就觀察到大自然嘅變化，例如月嘅陰晴圓缺、潮汐嘅漲退、一年二十四節氣更替等等。所以，順理成章，我哋裘氏一族就成為廟祝打理北帝廟，同時幫村民推算各種吉日。而我哋靠嘅就係不斷嘅觀察、統計同推算。可惜，我哋算咗180年，不但算唔到玄武大帝何時回歸，亦算唔到大凶日嘅嚟臨…如果可以比我見到玄武大帝…我真係想佢傳授呢個世界所有嘅公式…不過我知未必有呢個機會…希望阿綠可以比一個好嘅答案我哋…
時間：180年9月10日中午1時
地點：封閉區域Area DB Island 北帝廟外，村民大會開始
*推門聲效
眾村民：村長出嚟啦！
盧綠：各位村民！剛才我請示完玄武大帝，佢託我同大家講，生活一切如常！大家唔駛擔心！
裘雪：阿綠，咁你頭先點解大嗌？
盧綠：頭先…因為玄武大帝同我講咗大凶日嘅原因…
眾村民：吓！？
盧綠：玄武大帝話九頭海蛇想衝破封印，黑暗嘅妖邪之氣籠罩整個區域。不過，佢已經處理好啦！
凱安：阿綠，咁你話我知九頭海蛇封印喺邊一個位置！我去檢查一下。
盧綠：阿安，唔駛你操心。
凱安：阿綠，得你一個可以同玄武大帝溝通，得你一個知發生咩事。但大凶日之後，點解玄武大帝唔現身，令村民安心呢？
盧綠：阿安，玄武大帝佢真係會回歸架
裘雪：咁佢有無講幾時回歸？
盧綠：確實日子…
凱安：咁不如等我同阿雪，代表凱氏同裘氏去同玄武大帝接觸啊？
盧綠：但係…呢180年嚟…只係得村長可以…
凱安：咁，就趁所有村民係度，重新選過村長啦。
盧綠：阿安你！阿雪…你出句聲啊！
裘雪：阿綠，唔好意思，我讚成阿安嘅提議。
盧綠：連阿雪你都咁講！即係連你都唔信我呢位村長啫！
裘雪：我唔係唔信你…只係…大凶日之後，我唔知應該信邊一個啊…
盧綠：信玄武大帝囉！
裘雪：咁請你叫佢現身！令我哋可以繼續喺度生活落去啦！
盧綠：阿雪，我都話玄武大帝會回歸，只不過…
裘雪：阿綠…我哋裘氏只係要一個確實日子，希望你哋盧氏明白…
凱安：阿綠，我哋凱氏都希望你哋盧氏明白。
盧綠：即係你哋依家要推翻我呢位村長啦？
凱安：唔係推翻，而係三大族所有村民都希望得到真相，而真相唔應該得村長知道。
盧綠：咁你依家想點啊？想捉住我定係想殺咗我，然後成為村長啊？
裘雪：阿綠，你冷靜少少先。
凱安：阿綠，我哋從來都無諗過要傷害你。我哋只係想用一個理性嘅方法，令所有村民安心同信服。
盧綠：呢180年嚟，一直都係我哋盧氏接任村長之位，呢個就係最安心嘅方法。
凱安：你到依家都唔明，大凶日之後一切都改變晒啦！唔係你一句，就可以決定全村人嘅命運！
盧綠：係你哋唔明白，嗰句唔係我講，而係玄武大帝指定要我哋盧氏承繼村長之位。我哋三大族各有崗位，係神嘅旨意。
凱安：係神嘅旨意，定係你借神之名落嘅旨意啊？
盧綠：阿安，你質疑我唔緊要…你唔好質疑呢180年嘅傳統同安排！
裘雪：阿綠，你由細到大都以村民嘅福祉為依歸呢個理念去學做村長…點解依家你會咁固執呢？
盧綠：我唔係固執！而真係為大家著想！相信我！啞鈴洲唔會發生任何事！會同以前一樣風調雨順，洲泰民安！
凱安：阿綠，咁你唔好怪我唔客氣啦！
盧綠：阿安！你想點啊！
裘雪：阿安，你唔係諗住…
凱安：放心，我好冷靜，我哋成個凱氏都好冷靜。所以，我都希望所有村民冷靜，去諗清楚啞鈴洲嘅未來！我動議所有村民投票，一齊決定啞鈴洲嘅未來！
裘雪：阿綠，呢一刻，呢個方法係最好，希望你明白…
盧綠：咁如果…就算你哋成為村長…都唔可以同玄武大帝接觸…得我哋盧氏接班人可以呢…？
凱安：阿綠…又係你話得村長可以同玄武大帝溝通，你依家又話得盧氏先有呢個資格…你仲唔係借玄武大帝之名去亂下旨意？就憑你呢一句，你無資格做村長！無資格去打理啞鈴洲！
盧綠：（深吸一口氣）其實大家都係想見玄武大帝一面…由佢去安撫大家啫…係咪？既然係咁，不如我公開請示玄武大帝嘅方法，比每一個村民都可以有機會接觸玄武大帝，邊個成功嘅，邊個就係新一任村長！你哋有冇異議？
Zip噏劇場 《Game of Eden》第二季 小島篇 第29回 「村長選舉（中）」
阿攝 飾演 旁白
Potter 飾演 凱安
Harry 飾演 裘雪
Cfun 飾演 盧綠
編劇及製作 阿攝
音樂 BEAT FRIDAY (Giant、ROUND AND ROUND、UNDER THE RAIN、EXTENSION、BAD END、OTHER LOVE)
封面設計 Followmelikeblack
歌：達明一派《天問》
作曲：劉以達
作詞：周耀輝
Leave a comment and share your thoughts: https://open.firstory.me/user/ckyhgwclu0xlr08721i22wc7k/comments
