時間：180年9月22日
地點：封閉區域Area DB Island 地獄
白烏鴉盧地：曾經，我覺得死亡係生命嘅完結。我哋啞鈴洲世代嘅傳統儀式係將遺體火化，推出大海，希望靈魂可以回歸玄武大帝身邊。身為盧零嘅二仔，啞鈴洲第三任村長嘅我，當然知道呢個只係一個虛構嘅故事，用嚟掩飾呢個世界嘅運作，好聽嚟講係安撫人心，難聽啲嚟講係控制民生嘅說詞。但我唔介意，因為唯有死亡先可以完結作為盧零嘅仔嘅沉重使命。我做好阿爸同家姐交低比我嘅村長工作，然後期待死亡嘅來臨。
點知…當我過身之後醒返，見到身穿黑色羽毛袍嘅家姐盧天，我先知道死亡對啞鈴洲村民嚟講只係一個過程…而我同家姐就要繼續背負住齒輪嘅角色，生前協助在生嘅村民生活，死後協助靈魂轉世…
見到上天堂嘅靈魂，我無特別高興，因為佢哋只係上到半天堂，歡樂過後，都要輪迴做人；
遇到落地獄嘅靈魂，我無特別難過，因為佢地只要捱過地獄之苦，都可以輪迴轉世。
無靈魂會真正消失。
生於啞鈴洲，困於啞鈴洲。
直到呢一刻，喺我眼前呢位只擁有兩種顏色，由現實世界入嚟嘅阿達，佢左手竟然可以發出激光，將困喺地獄嘅靈魂打到灰飛煙滅…
我望住第一個被佢打散嘅靈魂灰燼…回想返生前出席過嘅葬禮情節，同一樣嘅灰燼飄蕩於半空之中…除咗問佢入嚟嘅目的之外，我腦入面都出現另一個問題，所以當見到嗰四個靈魂跪低喺阿達前面，我就直接問阿達：佢哋…會去邊架？係咪…會永遠消失？
達：我…都唔清楚啊…我想用黃紙吸返佢嘅…但被依家跪咗喺我面前嘅靈魂阻止咗…你見到我得兩隻色？即係都有全知狀態？你應該感受到呢班靈魂傳遞比我嘅訊息？
白烏鴉盧地：我感受到…佢哋想你用「希望之光」去解救佢哋…
盧葦：等等先…白烏鴉，仲有呢位阿達…你哋可唔可以解釋發生緊咩事？
裘智：阿達…你之前自稱自己係玄武童子…咁你即係同玄武大帝有關？
白烏鴉盧地：裘智…盧葦…唔好意思，根本就無咩玄武大帝…一切嘅神話只係有份創造呢個世界嘅盧零，即係我爸爸去創作出嚟…
裘智：即係…第一任村長盧零先係玄武大帝？
白烏鴉盧地：「玄武大帝」只係一個象徵，一個故事，一個被你哋去拜嘅像。其實可以叫做飛鳥大帝，或者叫烏龜仙人…只係盧零揀咗叫做「玄武大帝」…
裘智：咁…我哋仲係唔係由深海嘅盧亭進化而成…
白烏鴉盧地：唔係…
裘智：咁…即係好似姐夫所講…呢個世界係虛構嘅…
白烏鴉盧地：咁又唔完全係虛構…至少我哋真係有存在過…
裘智：咁…姐夫所講嘅咩人工智能…又係咩嚟架…
白烏鴉盧地：呢一層，我諗由現實世界嚟嘅阿達去解釋就最清楚。
盧葦：阿達，你之前話入嚟搵我細妹盧婷…又係咩意思？呢個時候，你可以將你所知嘅所有事講曬出嚟未？
達：（讀白）我望住我身前四位仲繼續跪喺度嘅靈魂，再望住白烏鴉盧地、盧葦同裘智…深吸一口氣，就將我所知嘅所有事，包括 - 現實世界同Game of Eden 嘅關係、盧零嘅背景、佢同今敏創造呢個封閉區域嘅過程、人工智能嘅身份同工作、大凶日嘅事發原因、我點樣遇到盧婷同點樣入嚟、仲有入到嚟之後同盧綠到幾個島嘅經歷都一一講曬比佢哋知。而當中白烏鴉盧地會用佢前村長及渡靈者嘅角色去做補充。用咗好耐嘅時間…我終於都講完！
而當我一講完，裘智眼神空洞咁企咗係度。過多幾秒，佢枱頭望住我，突然衝去我身前好快咁打咗我一拳！
*急步聲效
*揮拳中拳聲效
*跌倒聲效
盧葦：舅父！你做乜打佢啊？你覺得佢講大話？定係？
裘智：（冷靜）阿達，你痛唔痛啊？
達：咁大力！梗係痛啦！
裘智：葦仔，捉住阿達！擘大佢個口！
盧葦：舅父，你做咩啊？冷靜啲啦！
裘智：你唔做，等我做！
*抓泥聲效
盧葦：（讀白）舅父佢抓起一堆泥，然後一隻手撳住跌喺地嘅阿達，另一隻手迫阿達食泥！
達：喂！裘智！你做咩啊！裘智！
裘智：快啲同我食咗佢！然後話我知係咩味！
盧葦：舅父！你唔好咁啦？
白烏鴉盧地：癲夠啦裘智！你再唔停手，我就用羽毛箭令你收手！
裘智：我癲？我只係想證明我地同佢哋有冇分別咋！
*達吐泥聲
達：有少少咸，好鞋，同海灘濕咗嘅沙泥無分別！我都話咗，現實世界嘅我同生活喺呢度嘅你地係一樣架！我哋只係活喺兩個唔同空間啫！
裘智：但你地隨時可以令我哋再有大凶日！同埋你哋可以隨時入嚟！但我哋唔可以出去！呢兩件事，就係我哋嘅分別！
達：咁至少…你哋真係有天堂、地獄同好實在嘅因果制度…同埋有好靚嘅藍天、白雲同海洋…仲有好清新嘅空氣…
裘智：咁我同你交換啊！
盧葦：（讀白）舅父無等阿達回應，就轉身行開幾步，跟住就自己一個人背住我哋坐低咗…
白烏鴉盧地：阿達…你係呢百幾年嚟第一個由現實世界入嚟嘅人。除咗島之盡處，向死而生之外，你對呢度一無所知？
達：我連點樣離開呢度嘅方法都唔知…
白烏鴉盧地：盧葦同裘智要進行換血嘅儀式，佢哋交換血液，由盧葦代裘智喺地獄受罪，咁我就可以帶裘智走。不過裘智依家應該無心情同理智去做呢個儀式…
盧葦：等我同舅父講下…
白烏鴉盧地：盧葦，你話曬都係我後人，我今次用親人嘅身份問多你一次，你知道呢個世界嘅運作之後，都決心要繼續代你舅父喺地獄受苦？
盧葦：我決定咗嘅事就唔會去改變。等我同舅父溝通一下。
*步行聲效
白烏鴉盧地：阿達，咁你呢？諗住點處置呢四位跪咗喺度咁耐，等緊你用「希望之光」嘅靈魂？
達：佢哋好似好想得到解脫咁…
白烏鴉盧地：但係…我哋到依家都唔知你打到佢哋灰飛煙滅之後嘅結果會係點…你咁做好有可能破壞呢個區域嘅機制…
達：或者…佢哋會去返生死中途島？
白烏鴉盧地：又或者佢哋會從此消失喺呢個世界？你左手嘅光究竟係希望定絕望？
達：嘩…你好似講到我掌握佢哋生死咁嘅…
白烏鴉盧地：實情如此。
達：嘩…好大壓力喎…你…比啲時間我諗下啦！
（讀白）就係我糾結緊應該點做嘅時候…突然又聽到四方八面傳嚟鐵櫃開門嘅聲！
盧葦：白烏鴉！啲鐵櫃又打開咗！
達：唔係啲…似係所有啊！你地睇下！有好多靈魂行出咗鐵櫃啊！
盧葦：10…20…30…有成三十幾個靈魂向我哋呢邊行緊過嚟啊！
達：係頭先嘅3倍？
白烏鴉盧地：可以做到呢件事，得人工智能！人工智能！你同我出嚟！
盧葦：白烏鴉！我褲代入面有野震緊…我拎出嚟一睇！係嗰條黑色羽毛啊！
白烏鴉盧地：黑色羽毛自己郁？唔通係！
*羽毛箭聲效
Zip噏劇場 Game of Eden 第二季 小島篇 第87回「地獄·4」
阿攝 飾演 阿達
鄧添樂 飾演 盧葦
阿O 飾演 裘智
小白 飾演 白烏鴉 盧地
編劇及製作 阿攝
音樂 BEAT FRIDAY (Fairness, Ignorance, Minty, Independence, Good Plus)
封面設計 Followmelikeblack
Leave a comment and share your thoughts: https://open.firstory.me/user/ckyhgwclu0xlr08721i22wc7k/comments
