OPEN HEAVENS
MATALA LE LAGI MO LE ASO TOONAI 28 FEPUARI 2026
(tusia e Pastor EA Adeboye)
Manatu Autu: Aao taumatau o le Atua (Gods right hand).
Tauloto Tusi Paia: Efeso 2:6 “Ua na toe fa‘atutū fa‘atasi mai fo‘i, ma fa‘anonofo fa‘atasi i tatou ma Keriso Iesu i mea o i le lagi.”
Faitauga - Tusi Paia: Salamo 110:1-3
O le fa’aupuga “aao taumatau” e tāua tele I le Tusi Paia. O loo fa’aalia ai se tulaga o avanoa aloaia, se nofoaga mamalu ma fa’aaloalogia. Mo se fa’ata’ita’iga, o lo tatou Alii o Iesu Keriso o loo afio i le itu taumatau o le Tamā (Eperu 1:3). Ua fa’aalia fo’i I le Eperu 12:2, ina ua uma ona puapuagatia Iesu ma maliu i luga o le satauro, ona nofo ai lea o Ia i le itu taumatau o le nofoalii o le Atua. O le aao taumatau o le Atua ua fai ma sui o lona malosi silisili ma lona mana. Fai mai le 1 Peteru 3:22 “o ia o lo‘o i le itū taumatau o le Atua, ‘ina ‘ua afio a‘e o ia i le lagi, na to‘ilalo ‘iā te ia o agelu, ma faipule, ‘atoa ma ē malolosi.”
O le tagata o loo faatatau i ai le fuaiupu ua taua i luga, o Iesu. O Ia o loo afio i le aao taumatau o le Atua ma le mana uma lava e gaua’i atu i le Atua. Po o le a lava se tulaga maualuga faalelalolagi o galue ai se uso, e sili atu lava le mana ma le pule o i le aao taumatau o le Atua. O le aao taumatau o le Atua o le nofoaga e gaua’i i ai agelu uma, Pule ma le mana uma i le Atua. Fai mai fo’i Salamo 18:35; o le aao taumatau o le Atua o le nofoaga o tausiga ma fesoasoani. Fai mai le fuaiupu tauloto o le asō, ona o i tatou o fanau a le Atua, ua nonofo faatasi i tatou ma Keriso, ma talu ai o lo o i ai Keriso i le aao taumatau o le Atua, o loo tatou i ai fo’i faatasi ma Ia.
O le i ai i le aao taumatau o le Atua o lona uiga, e lē taitai e mativa i fesoasoani ma foa’i. O lona uiga e te maua pea e lē aunoa i le taimi e manaomia ai le fesoasoani tele e te manaomia. O i latou o i le aao taumatau o le Atua, e lē itiiti i latou auā o lona aao taumatau o le nofoaga o le mana, e pei ona o tatou vaaia i le Mareko 14:62; fai mai, ‘“Ona fetalai atu lea o Iesu, “O a‘u lava lea; ‘tou te iloa fo‘i le Atali‘i o le tagata e nofo i le itū taumatau o Lē e ona le mana,’ ‘e sau fo‘i o ia i ao o le lagi.”’
O lona uiga, o i tatou kerisiano, o tagata o le mana ma le fa’ama’ite. Tatou te ola fiafia i le fesoasoani, tausiga ma le manuia mai le Atua.
Paga lea, peita’i e ui o lo tatou fa’asinomaga lea o le fanau a le Atua, a o loo ola pea nisi kerisiano mamao ese mai le mea moni auā faapei o le atalii faamaumauoa i le Luka 15:11-32; na ta’asē i latou mamao ese mai le aao taumatau o le Tamā. Ua o latou usitai i le valaau a le agasala ma fa’atigā i le alofa tunoa o le Atua i luga o latou olaga.
Le au pele e, afai e te le’i talia ma gaua’i i le Atua, po ua e ta’asē mamao ese fo’i mai ia te Ia, ou te valaaulia oe i le asō e te sau ia te Ia. O loo tuitui le Alii i le faitoto’a o lou loto (Fa’aaliga 3:20); tatala lou loto ia te Ia, o loo faatalitali lou Atua e talia oe i ona aao mafola; aua e te tuua lou Tamā ia faatalitali ai pea mo oe. Sau e talia ma fiafia i lou nofoaga i le aao taumatau o lou Atua, i le suafa o Iesu, Amene.
