OPEN HEAVENS
MATALA LE LAGI MO LE ASO SA 21 TESEMA 2025
(tusia e Pastor EA Adeboye)
Manatu Autu: Faatonutonu o le faauuga 1 (Conductors of the annointing 1)
Tauloto Tusi Paia: Salamo 23:5 “E te laulau mai mea i le la‘o‘ai ma a‘u, i luma o ē ita mai ‘iā te a‘u; ‘ua e fa‘au‘uina lo‘u ulu i le suāu‘u; ‘ua taumasuasua la‘u ipu.”
Faitauga - Tusi Paia: Ioane 4:34-38
E pei ona tatou iloa i le tauloto mai le Tusi Paia o le asō, e na te faauuina le ulu o le tagata i le suauu. Peitai, o lima o le tagata e faatonutonuina le faauuga. I le 1 Samuelu 17:34-37, na fasi e Tavita le leona ma le urosa i ona lima. O ona lima foi na uuina ai le ma’atā na faatoilaloina ai Koliata (1 Samuelu 17:49). I le Faamasino 14:5-6, sa agai atu Samasoni i Timenata ae osofaia e se leona. Na oo mai le fauuga i ona luga ona ia saeluaina lea o le leona i ona lima. I le Faamasino 15:14-15, o lima foi o Samasoni na tago i le auvae o le asini ma avea ai o se auupega matautia na faaumatia ai le toatele.
O le ulu o le tagata faauuina e pei o le malosiaga e faia le eletise ma o lima o le tagata e mafai ona faatusa i ni uaea e auala ma faatonutonu atu ai le eletise i vaega e manaomia ai. O le faauuga i luga o le ulu o le tagata e fua iai le malosiaga e tauave e lea tagata i ona lima. E iai se aso sa ou faatau ai i se faletusi i se atunuu i fafo, ae pei lava o lau masani, sa ou pesepese ao ilo au tusi mai fata e fia faatau. Ua maea sina taimi, ae savali mai se tamaloa ia te a’u o loo ataata ma faapea mai, ‘e foliga mai o se aso matagofie lenei e tusa ma lou fiafia i lau pese’. Na ou ata ma lulu lona lima o loo tuu ma faatalofa mai. Ao savali ese, na ia faapea mai, ‘o le a le mea tupu? Ua alu ese’. Fai mai, sa puapuaga i le tua tigā mo le tele o tausaga, ao le taimi na ma lulu lima ai, na tea ese ai le tigā. O se lulu lima na oo atu ai se vavega ia te ia aua o o’u lima na faatonutonuina le faauuga mai lo’u ulu e oo atu ai i le tagata o loo ia manaomia.
Le au pele e, e te manaomia le fauuga a le Atua i lou ulu pe afai e te manaomia le mana poo le malosiaga e tauala i ou lima. E tatau ona faaalu lou taimi e mafuta ai ma le Atua ina ia faauu oe e le Atua. A faauu oe e le Atua, e te faaee ou lima i luga o ē mamai ona malolo lea. Afai o oe o se tagata faatuatua, e tatau ona e galue malosi e faia le galuega a le Atua. A e vaai i tagata mamai, faaee ai ou lima. Aua le tuua ou lima mai le faia o le galuega a le Atua aua o le faauuga o loo e tauaveina e ono le aogā pe afai e lē o faaaogaina i vaega o loo manaomia. O le tele ona faaaogaina o ou lima e faamalolo ai ē mamai, o le tele foi lena o le manaomia o le faauuga i lou olaga, o le tele foi lena o lou tuputupu ae. A tuputupu ae le faauuga i lou olaga, e faatuatuaina oe e le Atua e faia mea tetele e sili atu aua ua ia silafia e faataunuuina e ou lima mea o loo finagalo ai. O galue pea ou lima e faia le galuega a le Atua? I le suafa o Iesu, Amene.
