OPEN HEAVENS
MATALA LE LAGI MO LE ASO LUA 17 FEPUARI 2026
(tusia e Pastor EA Adeboye)
Manatu Autu: O le mealilo i le faaeaina (The secret to promotions)
Tauloto Tusi Paia: Salamo 75:6-7 “Auā e lē o sasa‘e po o sisifo, po o le vao e i ai mauga, a o le Atua na te fa‘amasinoina, o ia na te fa‘amaulaloina le tasi, o ia fo‘i na te fa‘aeaina i luga le tasi.”
Faitauga - Tusi Paia: 2 Samuelu 6:13-23
E masani ona faamatalaina Tavita e tagata i ni auala eseese: o le talavou leoleo mamoe, o lē faato'ilalo sau'ai, o le tagata tapua'i, ma isi. E ui i nei faamatalaga eseese, toeitiiti o tagata uma ua faalogo ma faitau ia Tavita e ‘autasi, o le mea pito sili ia te ia o lona iloa vivii i le Atua. O le mafuaaga lena na alofaina ai o ia e le Atua ma faaeaina faifai pea, ma oo i le tulaga ua manatu le toatele, o ia o le tupu sili ona tautaua o Isaraelu. Afai e te manaʻo e maua faifaipea le faaeaina ma le manumālō, e tatau ona e matuā fiafia e vivii i le Atua.
O le a tonu le viiga? O le vivii e lē o le faafetai, e le o le tapuaʻiga foi. O le tapuaʻi o le taʻuta’u atu lea i le Atua o Ia o le Tupu o tupu, le Aliʻi o aliʻi, ma so’o se mea e faaali atu ai, o ia o lou Aliʻi. O le vivii, o le mitamitai i le Atua, e pei o se tamaitiiti e mitamita i lona tamā. I le Mataio 21:15-16, o le au ositaulaga sili ma le au tusiupu na vaai i mea matagofie ma ofoofogia na faia e Iesu, ae na latou lē fia vivii ia te Ia. Peitai, na amata ona ‘alalaga tamaiti i le malumalu, ma faapea atu, "Osana i le Alo o Tavita." E ui e leʻi vivii i le Atua le au ositaulaga sili ma le au tusiupu, ae na feitai ona na matua sasa’a atu e tamaiti a latou viiga i le Atua. Aua le avea lou tulaga maualuga e te lē vivii ai i le Atua, aua a e faapena, e lē taulia oe i tagata e na te siitia ma faaeaina.
E na o tagata e pei o tamaiti, e mafai ona vivii faamaoni i le Atua. I le faitauga o le Tusi Paia mo le aso, ina ua toe aumaia e Tavita le atolaau a le Atua i Isaraelu, sa ia matua vivii i le Atua e aunoa ma le manatu i seisi. E lei maasiasi e siva i luma o le Alii; sa ia mitamita i le Alii i nofoaga faitele ma sa lē manatu i lona tulaga, lona tauleleia, po’o seisi mea, aua sa ia iloa, o loo ia vivii i Lē na foai atu mea uma ua ia maua. Ina ua vaai atu lona toalua o Mekala ia te ia, sa maasiasi o ia, ma a’oa’i Tavita ina ua foi atu i le fale, e faapea, "E te le maasiasi ea? E le mafai ona teu lou mamalu pe a e vivii ile Atua? E tatau ona e manatua o oe o le tupu." Na tali Tavita, "Tuʻu aʻu ou te vivii i loʻu Atua ma le le maasiasi. O Ia o lē na faaeaina aʻu e sili atu i lou tamā ma lou aiga uma. O Ia o le puna ma le pule o loʻu ola."
O tagata e vivii i le Atua e pei o Tavita e le uma ona olioli i le faaeaina. Aua lava nei e fa’atagaina manatu o tagata e leʻi feagai ma mea na feagai ma oe faapea manumālō na tuuina atu e le Atua ia te oe, e taofia ai oe mai le vivii malosi ia te Ia. Ia e filifili e mitamita pea i le agalelei ma le faamaoni o le Atua i lou olaga, ona ia siitia pea lea o oe i luga ma faamanuia ia te oe e faasilisili atu i mea o loo e manatu iai (Efeso 3:20).
Ia e mitamita i le Atua ma tau atu i se tagata i le aso, i lou ofisa, i lou pitonuʻu, i luga o ala o faasalalauga lautele, ma so o se mea e te alu i ai, i le suafa o Iesu, Amene.
