Edición número 1460 de O Recanto do Corcovado. Puidestes escoitala o venres 19 de setembro a través de RKV Radio Vigo, e o sábado 20 na sintonía de Cuac FM A Coruña, Rádio Filispim e da Radio Municipal de Redondela. Pechamos a rolda de emisións o mércores 24 de setembro a través de Radio Crónica Folk Musical.
Abrimos o programa desta semana dende Brasil para escoitarmos o último disco dos BaianaSystem. Gravárono con convidados de luxo: destacamos, entre outras, as figuras de Gilberto Gil e Seu Jorge. De Salvador saltamos a São Paulo para presentarvos “Vale a pena”, o primeiro sinxelo do que será o novo disco de Sessa. O mundo do tropicalismo, en clave plural, lévanos a seguir até Londres, onde agardan por nós os Da Lata. Editarán o seu novo traballo a finais do vindeiro mes de outubro. Casapalma teñen tamén data oficial de saída de “Jotas”, o seu novo disco: 17 de outubro. Escoitamos dous adiantos antes de dar un novo salto xeográfico que nos leva até Finlandia. Xa ben instalados en terras nórdicas, preséntovos as últimas producións dos Ne Lintuizet, Tuuletar e Tapani Rinne & Wimme.
