Edición número 1471 de O Recanto do Corcovado. Puidestes escoitala o xoves 4 de decembro a través de Rádio Filispim, o venres 5 a través de RKV Radio Vigo e o sábado 6 na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 10 de decembro a través de Radio Crónica Folk Musical.
Abrimos o programa dende Londres co novo disco do colectivo Da Lata. Preséntovos a seguir dous adiantos discográficos. O primeiro, o emocionante e irreverente novo sinxelo de Benjamin Herman, gravado en formato trío en Tokyo. Formará parte de “The Tokyo Sessions”, disco que será editado no 2026. O segundo, a primeira peza extraída de “Ten One Two”, traballo que celebra o décimo aniversario do septeto austríaco Shake Stew. Pechamos este primeiro bloque do programa dende Australia con “Time Telling”, a nova experiencia musical dos Black Jesus Experience. Na segunda parte do programa entramos de cheo na política editorial e cultural do selo WeJazz. Escoitamos os novos discos do dúo Jonah Parzen Johnson & Lau Nau e de Magnus Carlsson, desta volta cos Moon Ray Quintet. Ámbolos dous discos están xa nas tendas, non así o traballo co que despedimos o programa. Trátase dun disco fondamente magnético na súa brevidade, o novo do trío suízo Divr. Gravado ao vivo no Festival de Cully, será editado oficialmente o vindeiro 12 de decembro.
