節目來賓：星洋本人
文學作品：【草猴】─向陽
【寫互春天的批】─向陽
【秋風讀昧出阮的相思】─向陽
【世界恬靜落來的時】─向陽
音樂作品：福爾摩沙合唱團音樂專輯《土地的歌》─作曲 石青如
【草猴】、【寫互春天的批】、【秋風讀昧出阮的相思】、【世界恬靜落來的時】
【草猴】
草猴草猴真趣味
雙手懸懸
親像佇田裡作指揮
叫風吹草埔
叫雨沃山路
叫遐的歹虫歹物
攏給我走去避
──向陽
【寫互春天的批】
想卜寫批互春天 向伊吐心悶
春天後母面 一時艷日一時雲
凡是蝴蝶就會隨花飛
凡是雁鳥就會找巢睏
春天全全假不知 害阮心酸酸
想卜寫批互春天 替阮帶音信
春天走去避 大山懸懸海深深
若是桃花伊就開滿園
若是紅雲伊就近黃昏
春天假意瞇瞇笑 笑阮人笨笨
想卜寫批互春天 請伊傳深情
春天恬誌誌 有時熱來有時冷
亦卜東平出日頭
亦卜西平出彩虹
春天歸尾有憐憫 幫阮鬥牽成
──向陽
【秋風讀昧出阮的相思】
秋天的風伊不捌字
掃落歸山紅葉冷吱吱
秋天的風 敢有影是妳
吹過山崙 吹過溪墘
就是吹啊吹
吹眛著阮的相思
阮的相思 是紅葉一片
對頭到尾 攏寫著你的名字
秋天的風 敢真正是你
害阮落地 互阮失志
就是讀啊讀
讀眛出阮的相思
──向陽
【世界恬靜落來的時】
世界恬靜落來的時
就是思念出聲的時
窗仔外的風陣陣地嚎
天頂的星閃閃啊熾
世界恬靜落來的時
我置醒過來的暗暝想起著你
我置睏未去的暗暝想起著你
想起咱牽手行過的小路
火金姑舉燈照過的田墘
竹林、茫霧和山埔
猶如輕聲細說的溪水
世界恬靜落來的時
──向陽
--
Hosting provided by SoundOn
