[55]. नागा फोम गॉस्पेल सॉन्ग.mp4 //
1 KORINT 15 - Khrista Yangei Leipü1Jeihinaü hatü nyahinaüthü, ngei am kü baongpü shahjangmei mepa ammi yah, hatü ha kü am yaongshi nyüpa, hapa ngei shao am kü shaang ehünyüke. 2Ngei am kü venpü shah kü wongshongi shümjema, ammi angkü vaipü nevaiphei keyü hapa shahjangmei homei am yangteke. 3Mehenangkü ngei mehe dang, ha nyokei shongpü shongnyü vaishi ngei am kü jaiyei shuohtepih: hapayü Laihing kü nyupükei jenei mang shing Khrista di, 4hatü büpa mahng vü, hatü Laihing kü nyupükei nyih jempabü kü yangei lei, 5hatü büpa Cephas touei vam, hatü hapheikü anpünyi touei vam; 6hapheikü hepak hük kü jeihinaü hatü nyahinaüthü jom kho nga dok kü nyeishi nyupü touei vam; hanei am didaijao longshi shing yemmü nyüke. 7Hapheikü büpa Jakob touei vam, hapheikü phongshanthü peü touei vam. 8Shompülei nelomi bühpükei nyupü ngei kao vamei huteke. 9Mehenangkü ngeiyü phongshanthü khongkü peü mü maanpü, phongshan shei nyükhen neshangpü; mehenangkü ngei Kahvangei attoi kü shüveihampeih. 10Shejao Kahvang phahji homei ngei shaang mehe nyu ha hih, hatü büpalei phahji ngei shingvaishi angsha neleidai. Halei meyü jomphong peü mü ngeiang nyeishi kheyei dükpeih– hapayü ngei nevai, shejao ngei mü nyupü Kahvang phahji homei. 11Hapayü ngei vaijao, jomphong vaijao hami ha chongvennyeih hatü ha kü am hinglempeih.
