[P2].Bugis Language - "Good News".3gp //
1 Korintus 151 Na makkekkuwangngè Saudara-saudara, uwèloriwi muwèngngerangngi paimeng Karèba Madècèng polè ri ELOHIM iya uwabbirittangngè riyolo lao ri iko. Purani mutarima, sibawa mateppe' lao ri Kristus nasaba Karèba Madècèngngèro. 2 Rèkko makkatenning masse'ko ri aga iya uwabbirittangngèro, iyaro Karèba Madècèngngè napassalama'ko; sangadinna rèkko saudara mateppe'i temmappahang. 3 Aga iya upalettu'èwè lao ri Saudara-saudara iyanaritu iya puraè utarimato. Iya kaminang pentingngè, pada-pada iya tarokiè ri laleng Kitta'è, upalettu'i lao ri iko makkedaè matèi Kristus nasaba dosa-dosata; 4 sibawa rikuburu'i, iyakiya rimunri ripatuwoi paimeng ri esso matelluè. Iyaro taroki towi ri laleng Kitta'è. 5 Uwappaissengeng towi lao ri iko makkedaè iyaro Kristus iya puraè ripatuwo paimeng pura toni nappaitang Alèna lao ri Pètrus, nainappa lao ri iya seppulo duwa rasul-è. 6 Purairo nappaitang towi Alèna lao ri lebbi lima ratu tau iya maccowèriyèngngi. Maègangngèngngi polè risining tauwèro tuwo mupi makkekkuwangngè, nappai siyagangngarè tau iya matèènna. 7 Purairo nappaitang towi alèna Kristus lao ri Yakobus nainappa lao ri sininna rasul-è. 8 Paccappureng senna'na nappaitang towi alèna lao ri iyya -- iyya iya pada-padaè ana'loloè iya jajiyè dè'pa nawettunna! 9 Iyya iyanaritu rasulna Puwangngè iya kaminang mariyawaè. Dè' usitinaja riteppu rasul, saba' purani upanrasa-rasa jema'na ELOHIM. 10 Iyakiya nasaba pammasèna ELOHIM, mancajika pada-pada keadaakku makkekkuwangngè. Nadè' naparacuma ELOHIM maddampengekka. Mala iyya ritu iya majjamaè lebbi marejjing naiya sininna rasul laingngè. Iyakiya iyaro sitongenna tenniya usahaku; iyaro usahana ELOHIM iya mamasèiyèkka sibawa iya majjamaè sibawakka. 11 Jaji, muwi polè kègai mutarima Karèba Madècèngngèro -- polè ri iyya'ga iyarè'ga polè ri rasul-rasul laingngè -- iyaro dè' namancaji soal. Iya pentingngè iyanaritu riyabbirittangngi iyaro Karèba Madècèngngè namateppe' Saudara.
