Dukkusjónleikur er eisini fyri vaksin. Hetta siga Eyðun Johannessen, leikstjóri, og Rakel Helmsdal, rithøvundur og dukkuleikari, tá vit hitta tey á kreativa kvistinum heima hjá Rakel. Eisini verður tosað um eitt nú søguna handan dukkusjónleik, og hvørjir serligir møguleikar eru í dukkusjónleiki.
Leygarkvøldið fer aftur ein nýskrivaður føroyskur sjónleikur av bakkastokki. Talan er um feministiska leikin Einaferð var tað eg, sum Mariann Hansen og Durita Dahl Andreassen hava skrivað, og sum Búi Dam hevur leikstjórnað. Vit fara at fregnast í Perluni, har leikurin verður spældur.
16 aðrir leikir verða eisini á palli í Sjónleikarhúsinum um vikuskiftið. Talan er um stuttleikir úr átta londum, nú NEATA Short Play Festival 2016 verður hildin í Føroyum. Og talan er um áhugaleik, sum vit eisini frætta um í sendingini.
Runavíkar kommuna er í serflokki, tá umræður arkitektur. Hetta var staðfest á føroysku Arkitekturdøgunum, ið vórðu hildnir í Havn farna vikuskiftið.
Vit hava fregnast um hvat, hví og hvussu, eins og vit eisini skifta orð við Henrik Stjernholm, ið er fyrrverandi býararkitektur í Vejle kommunu.
Í sendingini tosa vit við Eyðun Johannessen, Rakel Helmsdal, Heidi Poulsen, Janus Trúgvason, Tórbjørn Jacobsen, Henrik Stjernholm, Búa Dam, Mariann Hansen, Duritu Dahl Andreasen, og Rudolf Joensen.
Mentanarcaféin kann hoyrast her!
