Historical narrative about the expedition of Ernest Shackleton in Antarctica in 1914-1916. This story tells of the extra-ordinary and heroic feats the expedition crew suffered and endured. This is the SEVENTH (7th) of the 11-part series narrated in ILOCANO.
EXCERPTS:
"...Agalas tres ti parbangon ti maika DIYES Y NUEBE (19) ti Mayo, idi nagtuloyen a nagluas da Ernest, Worsley ken Crean manipud iti Kampo a Peggotty ket inrusatda ti nagna a simmang-at iti daydi ummong dagidi turod a nabungon iti hielo.
Iti daydi a tiempo, nakaluban daytoy iti napuskol nga hielo ket tunggal askaw ken panagbaddekda ket nairus-rusat a pug-pugto. Immuna a rinikusda daydi igid ti dakkel a bantay a hielo ket inalistoanda ti limmabas kadagidi nababa a disso idi bimmaba ti danum ti baybay. Nagtengda ti akin-Daya nga ungto ti bantay a hielo ket naamirisda daydi dakkel a nagbaliwan daytoy iti daydi kallabes a DUAPULO KET UPPAT (24) nga oras a panagtudona iti niebe ken panaganginna. Naglanga daydi bantay a kas sangol ti arado a simmango iti baybay.
Naimatanganda iti takdang iti nalikudan ti bantay a hielo ti naummong a pakailasinan ti dadael a sinagaba dagiti daksanggasat ti napagtengna a bapor. Adda nakitada a naukitan a paragpag a kayo a mabalin a naggapu iti kadagidi bapor ti un-unana a panawen. Adda pay kayo a nabarabadan iti landok a kinnan ti lati, nasagsag a bariles, ken dagidi kadawyan a narumrumek a dadael iti taaw."
"...Dida nagsardeng ket saan a nagbayag, agkal-kalay-atdan nga agpa-Daya a napan nanglinteg nga agturong iti bangir nga igid ti isla. Napuskol daydi niebe a pagdeppesan dagiti baddekda ket bimmuntogda a nagna. Kalpasan ti dua nga oras a panagsang-atda nakagtengda iti agarup DUA RIBU LIMA GASUT (2,500) a kadapan ti kangatona a disso.
Nagnayon a kalmado ti panawen ket iti iyaasidegda kadagiti turturod a nangangato, rimmuar ti lawag ti bulan a nangsilnag iti nakayaplag a buya ti aglawlaw. Nangangato a tapaw ti tur-turod, di-madaliasatan a teppang, nasang-at a bakras a nakumotan ti niebe, gleysyer a narurusod dagiti sikiganda ken atitiddog a tanap ti niebe a nayaplag iti rabaw ti hielo a pat-patag.
Adda nalisianda a dakkel nga abut a nasirpatda iti panagsilnag ti bulan. Ngem simmangbay ti angep ket limmidem ti aglawlaw. Inggalutda dagiti tali kadagiti sibetda ket intalgedda ti panagsisilpoda kas patalged ti pannakaliklikda iti peggad kadagiti abut, teppang, derraas ken di mapakpakadaan a pannakaikaglis.
Idi agbannawag, immingpis daydi angep a nagpangato. Manipud iti daydi ayanda idin a TALLO RIBU (3000) a kadapan ti kangatona, (agarup maysa a kilometro a kangato!) nasirpatda ti ipagarupda a danaw ngem baybay daytoy idi, a managan Possession Bay iti Amiananda. Nagsardengda iti apagbiit a nangipauneg iti balonda a biskwit. Nagpapatanganda no ania ti nasisiyaat nga aramidenda: bumabada a bumallasiw iti tapaw a hielo ti danaw wenno itultuloyda a pagnaen ti bantay a nagtakderanda.
Pinilida ti bimmaba ket kalpasan ti maysa nga oras a pannagnada, nasirpatda dagiti derraas a nagbalin a paset ti hielo a bantay (gleysyer). Idi nagpangato ti init, ket nagpangaton amin nga angep, nakitada a daydi danaw ket nagtungpal iti adayo.
Naamirisda a daydi adda iti imatangda ket isu ti baybay nga agpataaw iti akin-Daya a paset ti isla – isu daytoy ti Possession Bay. Nagsublida nga immuli iti daydi bantay a nagpanawanda ket nagturongda iti Abagatan-Daya agsipud ta daydi sursurotenda a mapa nga inaramidda iti kadagidi immuna a panangadal ni Ernest ken Worsley iti aglawlaw ket nagimarka nga adda pay dua a baybay a nanglennek iti igid ti isla sakbay ti Stromness..."
PLEASE LISTEN TO PODCAST FOR THE FULL AND COMPLETE EPISODE.
