Inspirational biographical narrative in the Ilocano language of the Philippines about Florence Nightingale.
EXCERPT:
Pasaray managanan “Senyora A Nakalampara” gapu ta kadawyan idi nga agtrabaho uray tengnga ti rabii. Maysa-maysaenna a sarungkaran iti inaldaw dagidi masakit agingga iti maungpotna amin ida. Adu nga oras nga agtrabaho agsipud ta amirisenna ti kasasaad ti tunggal maysa. Uray kaunggan ti rabii idi, agriing a mapan kumita iti masakit nga agrigat. Naisalsalumina a nars ni Florence Nightingale. Adu dagiti nagapuananna a pagsayaatan. Maysa kadagitoy ti panangiyaramidna a mabalbaliwan ken mapasayaat ti pannakataripato dagiti masakit ken kasta met a mapasayaat ti pannakaiwardas dagiti trabaho iti uneg ti ospital.
Kadagidi a panawen, narikut unay ken ad-adayo a narigrigat ti rebbengen ken ibturan ti maysa a nars no mainaig kadagiti nars iti agdama. Saan a nagalumiim ni Florence a nagserbi kadagiti masakit iti baet ti saan a yaannamong ti pamilyana iti panagbalinna a nars.
Naiyanak ni Florence idi MIL OTSO SIYENTOS DUAPULO (1820) bayat ti kaadda dagiti nagannak kenkuana iti bakasyon idiay siyudad ti Florence idiay Italia. Ingles dagiti dakkelna ket agnaedda idiay London. Impanagan ngarud daydi agassawa ti nagan daydi siyudad iti daydi naipasngay nga anakda. Nagtaud iti nabaknang ken maes-essem a pamilya ni Florence. Adda manangenna a managan Parthenope ket kas kenkuana, nayanak met iti sabali a lugar daytoy. Daydi nagan ti lugar a nakaiyanakanna ti inadawda nga impanagan kenkuana. Ti parthenope ket adda idiay Napoli (Naples) a siyudad ti Italia. Idi babassitda nga ubbing, kadawyan idi a ni Florence ti naayat nga agdait. Ni Parthenope ti kanayon nga adda iggemna a libro. Kas nakaugalian dagiti pamilya nga aristokrato ken addaan prebilehiyo iti sosyedad idiay Inglatera, immuna a nagadal ni Florence babaen ti pannarabay ti maysa a mannursuro ken taga-aywan idiay uneg ti pagtaenganda. Saanda a napnapan nagadal iti eskwela a nagadalan dagiti kadawyan a tattao.
Ngem idin ta daydi amada ti nagakem a mannursuro kadakuada, ni Parthenope ti nagpakita ti kinalaingna iti artes ken musika. Ni Florence ti nagtudio ket nagbalin a managimtuod ken managbasa. Nagsupadi ti interes ni Florence ken ti kabsatna. Bayat a ni manangna ket adda idiay salonda a nakidisdiskusyon iti inada maipanggep ti alta-sosyedad, adda met ni Florence a nangad-adal maipapan iti medisina ken dadduma pay a pagsiriban.
CONTINUE ON (LISTEN TO PODCAST)
