Inspirational biographical narrative about Joan of Arc in Ilocano.
EXCERPT:
"...Martir, santo ken bannuar. Ket babaen ti panangiturong ti Dios kenkuana, indauloanna ti militar ti Pransia iti panangparmekda kadagiti Ingles. Maraem a balasang daytoy. Kadagiti nagan a panangam-ammoan kenkuana dagiti kadawyan a makipagili iti Pransiya: Jehanne d’Arc, Jehanne Tarc, Jehanne Romée wenno Jehanne de Vouthon, pinilina ti Joan D’Arc nga isut’ mainagan kenkuana.
Pagaammo ti tattao ni Joan (Huana) a ‘Balasang idiay Orleans’ nupay naiyanak daytoy iti purok a managan Domremy idiay lugar ti Lorraine (‘Loreyn’), Pransia. Naipasngay daytoy idi MIL KUWATRO SIYENTOS SANGAPULO KET DUA (412) kada ’ Jacques d Arc ken Isabelle Romee.
Nanumo ti panagbiag dagiti tattao idiay purok ti Domremy. Ket kas kadagiti dadduma a purpurok, agsasallupang dagiti dan-dana. Akikid dagiti pagdalanan a naibabaet kadagiti balbalay a naatepan ti pan-aw. Agpasto ti baka ken karnero ti pagbi-biaganda ket agtrabaho amin dagiti agtutubo nga agpastor.
Iti maysa a nalawa ken nangato a limpiya a lugar, ditoy ti pagtub-tuboan ti agduduma a ru-ruot. Iti nagteng-ngaanna, adda nangayed a dakkel a kayo nga agrangpaya. Ditoy ti paggus-gustoan dagiti ubbing a papanan no tiyempo ti kalgaw. Mapanda ditoy nga aguummong nga agay-ayam, agkan-kanta ken agsa-sala.
No panawen ti panagtubo, isunto met ti pagaramidanda iti korona ti sabsabong ket ibitinda dagitoy kadagiti naruay a sangana. Dayta ti kas pangay-ayoda kadagiti enkantada nga adda sadiay tapno iti kasta, saan a mangdangran dagitoy di-makitkita kadagiti ubbing. Patalawenda ketdi dagiti insekto ken dagiti uleg nga umasideg iti kayo no maay-ayoda.
No adda idi matay nga ubing iti purok kunaen dagiti tao nga uray dagiti enkanto idiay a kayo ket agladingitda. Ipaltiingda ti leddaangda inton dumanon ti aldaw ti pannakaitabon. Addanto datdatlag a naibitin a sabong a managan immortelle iti sanga ti batog ti nagtugtugawan ti natay nga ubing.
Pasaray idi a dagiti ubbing a dimmakkel idiay Domremy ket mapan-panagananda iti ‘Ubbing iti Kayo.’ Pagaayatda met ketdi ti maawagan iti kasta agsipud ta ti kaipapanan daytoy kadakuada ket naaddaanda iti naispirituan a pribelehiyo.
Tallo ti kakabsat ni Joan a lallaki nga immun-una ngem isu. Adda met kabsatna a babai nga adingenna. Dimmakkel ni Joan a nakipagbiag ken nakipagay-ayam kadagiti padana nga ubbing iti purok a kas kadawyan kadagiti agnaed idiay. Numan pay saanda a masisirib, nasiyaat ti panagpus-pusoda. Mannakigayyemda nga ubbing ken natulnogda kadagidi dadakkelda. Nasisingpetda ket raemenda unay ti padi ti simbaan. Naadal ni Joan ti panagdait iti inana ket kas kenkuana, nagbalin met daytoy a nalaing a mannait.
CONTINUE ON. Listen to PODCAST for the full story.
