Part 1 of 2 part narrative. Inspirational account about the life, battles and travels of Alexander the Great- in the Ilocano language.
EXCERPT:
Naiyanak ni Alehandro idiay siyudad ti Pella idiay pagarian a Masedonya idi TALLO GASUT LIMAPULO KET INNEM SAKBAY NI KRISTO 356 BC. Anak daytoy ni Ari Felipe a Maikadua (Philip Il) ken Reyna Olympias ket pinanagananda daytoy ti Alehandro. Miyembro ni Ari Felipe-a-Maikadua (II) iti kaputotan ti Argead a puon dagiti immuna a nagar-ari iti Masedonya. Maikatlo nga anak daytoy ni Ari Amtas a Maikatlo iti daydi a puon ni Ari Felipe II. Nagbalin a maikasangapulo ket walo (18) ni Felipe II a nagari iti Masedonya. Nagtugaw daytoy a simmukat ken Perdiccas III a kabsatna idi natay daytoy.
Iti daydi a panagtugaw ni Felipe II nga agakem a mangituray iti Masedonya, nagkarigat idi daydi a pagarian agsipud ta sinerrek daytoy ti tallo a nagsasaruno a puwersa ti ruar a nagpanggep a mangrabsut iti turay. Naimbag laeng ta nabaelan ni Felipe II a pinapigsa ken pinatibker ti sitwasyon ti pagarian. Nangipagna daytoy idi iti reporma ti militar nga isut’ nangpakired ken nangpabileg iti puwersa militar ti Masedonya. Napagbalinna ti Masedonya a kabilegan idiay lugar a managan itan ti Yuropa kalpasan a naparmekna amin dagiti kabangibang a kaarrubana a kaputotan ken pagarian. Daydi a bileg ti puwersa-militar ti Masedonya ket tinawid ni Alehandro idi simmublat daytoy a nangituray iti pagarian.
Ni Reyna Olimpias nga ina ni Alehandro ket naiyanak a managan Myrtle. Nakuna a nagtaud daytoy iti kaputotan ni Ari Aeacus a Griego ken namunganay iti puon ti didiyosen a ni Achilles. Nagsukat daydi naganna a Myrtle iti Olimpias gapu ta makatawen kalpasan ti panagassawada ken ni Felipe II, nangabak ni Felipe iti karera ti kabalyo iti Olimpik. Daydi nga Olimpik ket rinnissiris dagiti kabkabalyo iti nagduduma a kabaelan ken sinniglatan.
Kas naisurat kadagiti kadaanan a libro dagiti diyosen ti Griego a nagtaeng iti Bantay Olimpus, adda pammati dagidi immuna a tattao a Griego a ti napudpudno nga ama ni Alehandro ket ti naindaklan a diyos a nagtaeng iti Bantay Olimpus. Isu daytoy ni Zeus. Ni Zeus ti mangituray kadagiti amin a diyosen idiay Bantay Olimpus.
Nabileg a militar ken maingel a mannakigubat ni Ari Felipe II. Napagbalinna ti turay ti Masedonya a napigsa a puwersa ken es-essemen a pagarian. Ngem saan a napnek ni Ari Felipe II iti kadakkel ti iturayanna. Tinarigagayanna nga iturayan ken tagikuaen ti imperio a pagarian ti Persia tapno inayonna a pagarian ti Masedonya.
Idi nagtawen ni Alehandro iti SANGAPULO KET DUA (12), naimatangan ni Ari Felipe ti kinasiglat ken kinaturedna nga ubing. Napaamo ken napagtungpalna ti atap, rusanger ken langalang a kabalyo a pagaammo idi nga awan pulos makabael a mangpaamo ken mangiggem kenkuana.
CONTINUE ON (LISTEN TO PODCAST FOR THE REST OF THE EPISODE)
