Inspirational biographical narrative about Helen Keller in the Ilocano language.
EXCERPT:
Naiyanak ni Helen Adams Keller idi maika-DUAPULO KET PITO TI HUNYO, MIL OTSO SIYENTOS WALOPULO wenno Hunyo 27, 1880 idiay Estados Unidos (Amerika). Opisyal a soldado ti konpederasyon ti Estados Unidos ti amana a ni Kapitan Arthur H. Keller. Ni met Kate Adams Keller ti inana. Natatakneng ken nangangato a tattao ti kaputotan ti kaamaan ni Helen. Abogado ken editor ti peryodiko daydi amana ket nagnaed ti kaamanda idiay bassit nga ili ti Toscumbia idiay amianan a paset ti Alabama. Idi sangapulo ket siyam a bulanna a tagibi, nagsakit ti nangato unay a gurigor ket isut’ nang-gapuanan ti pannakapukaw ti silaw ti matana. Nairaman a naawan ti panag- deng-ngegna.
Idi agtawen ti pito, impan dagiti nagannak kenkuana iti maysa nga imbentor a mangngagas a managan Doktor Alexander Graham Bell. Malaksid iti paga-ammo a kinalaing ni Dr. Bell a kas imbentor ti telepono idi, maysa daytoy a mannursuro iti elokusyon wenno nalinteg ken nasayud a panagsao. Ni Dr. Alexander Graham Bell ket kadua daydi imbentor met nga amana a ni Alexander Melville Bell. Ni Alexander Melville Bell ti nangaramid ti sistema ti panagsurat ken panagawat nga agpaay kadagiti saan a makang-ngeg. Buklen daytoy ti simbolo a paka-tarusan dagiti saan a makangngeg no kasanoda a mapaguni dagiti simbolo tapno agbalin a nakaaw-awat dagitoy a sao. Maysa a mangngagas a naasi kadagiti awanan panag-dengngeg ni Dr. Bell agsipud ta daydi inana ket maysa a saan a makangngeg. Ket idi ubing pay daytoy, no makisao idi ken ni nanangna ket masapul nga iyasideg ni Alexander Graham Bell ti bibigna iti muging daydi inana tapno marikna daydi ina ti pigerger wenno tremolo a mapartuat ti timek nga isut’ pakatarusanna iti maisasao ken maipapakaammo.
Idi napan dagiti dadakkel ni Helen ken ni Dr. Bell, imbalakad daytoy kadakuada nga iyalaanda ni ubing a Helen ti manursuro a taga-aywanna. Pinapanna ida idiay Boston nga ayan ti pagadalan dagiti bulsek a managan Perkins (Perkins School for the Blind). Inrekomenda kadakuada daydi direktor ti pagadalan a padasenda ni Anne Sullivan, maysa nga adalan a katurturposna ti panagadalna sadiay. Agtawen idi ni Anne iti 20 ket maysa kadagiti nagadal idiay nga addaan diperensiya ti panagkitana ngem naisalsalumina ti abilidad ken galadna.
Idi Marso 3, 1887 , isut’ idadateng ni Johanna (Anne) Mansfield Sullivan idiay pagtaengan dagiti Keller tapno aywanan ken adalanna ni Helen. Babaen ti pasensiya, panangawat ken ayat, tinarabay ni Anne ni Helen - ket inispalna ti ubing iti nagkaduaan a pannakairurumen iti lidem ken ulimek.
CONTINUE ON (LISTEN TO PODCAST)