Inspirational narrative about Uruguay’s former president -Jose Pepe Mujica Cordano in Ilocano language.
EXCERPT:
TI BIAG NI ‘PEPE’
"....PANAWEN idi ti dekada MIL NUEBE SIYENTOS PITOPULO (1970). Prominente a kameng ni Jose (Pepe) Mujica iti maysa a pagbutbutngan a grupo dagiti rebelde a managan Tupamaros idiay Uruguay. Bassit a nasyon ti Uruguay iti abagatan-daya a paset ti Akin-abagatan nga Amerika (Latin America). Agarup laeng a TALLO A RIW-RIW KEN UPPAT A GASUT A RIBU (3.4 M) ti dagup dagiti tattao nga agindeg idiay. Daydi a gimong a managan Movimiento de Liberación Nacional – pagaammo a Tupamaros wenno MLN-T (‘Tignay ti Liberasyon A Nasyonal’) ket timpuyog dagiti rebolusyonaryo a sumupsuppiat iti sistema ti gobyerno.
Kadagidi a tawen, ni Jose ti kangrunaan a rebelde a birbiroken dagiti otoridad ti linteg tapno tiliwenda daytoy. Nangidaulo ni Jose iti mano a panangraut kadagiti dadakkel a banko. Ket iti maysa kadagidi insangratda a panangraut, napasamak ti narungsot a pinnaltuog ken pannakirangetda kadagiti pulisya.
Napaltuogan daytoy ket sinerrek ti innem a bala ti bagina. Ngem nalasatanna daydi a pannakadangranna. Saan a nagbayag ket dimteng kenkuana ti panagsagaba a nangbaliw iti biagna. Iti kadagidi napasamak a pannakiranget dagiti rebolusyonaryo a limmaban iti represibo nga akem ti gobyerno, saan laeng a dagidi rebelde a Tupamaros ti naisebba ti biagda.
Adu a soldado, pulisya ken sibilyan ti nairaman a nat-natay. Agarup tallo ribu kadagiti Tupamaros ti natiliw ken naibalud. Siyam kadagitoy dagiti daulo a nakairamanan ni Jose. Nailasinda kadagiti kaadduan ket isuda ti naipaayan iti kadangkokan a pannakadusa.
Iti panagbaliw ti tiyempo kadagidi simmuno a tawen, nagbaliw met ti gasatda. Tallo kadagitoy a kakadua ni Jose ti nagballigi iti biagda idi naparuarda kalpasan ti nasurok a SANGAPULO KET DUA (12) a tawen a pannakaibaludda. Nagbalin ni Hernandes Huidobro a politiko ken mannurat. Nagbalin met ni Henry Engler a sientipiko iti utek. Ni Mauricio Rosencof ket nagbalin a mannurat ken mannaniw. Daytoy ket kalpasan a naited kadakuada ti pammakawan gapu ta nangideklara ti gobyerno ti Uruguay idi MIL NUEBE SIYENTOS WALUPULO KET UPPAT (1984) ti amnestiya."
LISTEN TO THE PODCAST FOR THE COMPLETE/ FULL NARRATIVE.
