Inspirational account about Abd Al Qadir Jilani, great Muslim teacher from Geylan in 1077 CE narrated in Ilocano.
EXCERPT:
Agtawenen iti sangapulo ket walo ni Abdul ket nakasaganan nga agturong iti siyudad ti Baghdad tapno agpatuloy iti panagadalna kadagiti nabileg a pagsiriban. Impakaammona iti daydi naanus nga inana ti gandatna nga umadayo tapno agpatuloy nga agadal. Naragsakan ti ina iti regget ti anakna nga agsursuro. Dakkel ti panagyamanna iti pigsa ti tarigagay ni Abdul a maaddaan iti natakneng a kinasirib.
Iti kadagidi a panawen, agdaliasat dagiti tao iti disyerto a magna iti adayo. Ngem no adda ayup a tarakenda ket adda bassit kabaelanda iti biag agsakayda iti kamelyo, wenno agluganda iti kabalyo. Adu dagidi umuneg a dana iti uneg ti kabakiran a malabsanda ket kadawyan nga adda peggad a masarakan wenno riru a masabat dagiti agdaliasat.
Inted ti ina ken Abdul ti bendisyonna. “Pat-patgek nga anakko, baketak unayen ket nalabit nga iti daytoy nga iyadayom, isun ti maudi a pannakakitak kenka. Itedko ti pammalubos ken ti bendisyonko nga addanto latta a kanayon kenka. Sapay koma ta ti Naidaklan a Mannakabalin Amin ket ipabus-oyna kenka ti balligi. Dios ti kumuyog kenka, anakko.”
“Daydi Dios-ti-aluadna nga amayo ket adda imbatina a walopulo (80) a dinar a patawidna kadatayo. Daytoy ti nangalaak iti uppat-a-pulo nga itedko kenka ta ibatik diay kaguduana nga agpaay ken Sayyid a kabsatmo,” kinunana.
Indait ti nanang ni Abdul daydi 40 a dinar iti lukip iti suli ti kawes ni Abdul tapno saanna a kasapulan a bitbiten. Iti daydi panagpakada ni Abdul, nagbilin ti inana. “Anakko, awatem daytoy a bilinko ket lagipem iti agnanayon. Agpatinayon ka a napudno ket pangngaasim ta saanka koma a pulos nga agisawangto iti ulbod.”
“Ay-ayatek nga ina, ikarik a patinayonko a laglagipen ken tungtungpalen ti bilinmo,” inkari ni Abdul.
Kimmuyog ni Abdul iti karaban (konboy) nga agdaliasat iti disyerto ket idi makagtengda iti paset a kallabes ti siyudad ti Hamdaan, simrekda iti maysa a nasamek a lugar iti disyerto. Sinabat ida ti grupo ti innem-a-pulo a bandido. Indauloan daytoy ti maysa a pagbutbutngan a managan Ahmad Badawi. Awan ti nabaelan dagiti konboy a pangsalaknib ket inagaw dagiti bandido dagiti napateg nga awit ken sanikuada. Kalpasan a nasamsamda amin dagiti kayatda, nagu-ummong dagidi bandido ket nagbibingayda.
Naulimek a nagmattider a nangsaksi ni Abdul iti panagsamsam dagiti tulisan kadagiti im-imet iti karaban. Awan sinnoman kadagiti mangngarang ti nangikankano kenkuana gaput’ kitana nga ubing. Ngem iti saan a nagbayag, maysa kadagitoy ti immasideg ken Abdul ket dinamagna no adda iggemna a napateg.
CONTINUE ON. Listen to the PODCAST for the full story.
