Historical account about Japan’s period of Sengoku Jidai (1500s) in Ilocano language (Philippines). It covers stories of courage, loyalty, respect and honour. This is part 1 of 4 parts.
EXCERPT:
"Maika-sangapulo ket lima a siglo idiay Daga a Pagsingisingan ti Init, nagbiag dagiti tattao a Hapon nga inturayan ni Emperor Go-Tsuchimikado. Isu idi ti maika sangagasut ket tallo nga emperor iti pagturayan a Hapon. Nagtugaw daytoy iti Chrysanthemum a trono idiay palasyo ti imperio idiay Kyoto manipud MIL KUWATRO SIYENTOS UPPAT A PULO KET DUA (1442) aginnga iti SANGAPULO KET LIMA A SIGLO (1500).
Segun iti Kronika ti Japan a Nihon Shoki ken iti libro a Kojiki maipapan kadagiti kostumbre ken tradisyon a Hapon, ti monarkiya a panangituray ti nobilidad a kaputotan idiay Hapon ket naipatakder idi tawen INNEM A GASUT KEN INNEM A PULO (660) sakbay ni Hesukristo. Impatakder daytoy ni Emperor Jimmu a naggapu iti puon ti Diosa ti Init a ni Amaterasu Omikami. Nakuna a ni Emperor Jimmu ket apo iti tumeng ni Ninigi-no-Mikoto, maysa a diosen a naggapu iti tangatang. Gapu iti daytoy, iti pammati dagiti Hapon a Shinto, nagpuonan ngarud pay ni Emperor Jimmu ti Dios ti Bagyo a ni Kami (espiritu) Susanoo.
Iti baet ti kaadda ti emperor ti pagarian - nga isu ti kangatoan a mangituray iti pagilian, adda met naipatakder a gobyerno militar ti Hapon kadagiti simmuno a siglo. Daytoy ti nangiggem iti husto a bileg ti turay ken isut’ nagikeddeng iti turong ti gobyerno iti pagilian. Daytoy a gobyerno militar ket managan bakufu nga idauloan ti shogun. Daydi kaunaan a bakufu ket impatakder ni Minamoto Yorimoto idi maika DUAPULO KET MAYSA (21) ti Agusto, MIL SIYENTO SIYAM A PULO KET DUA (1192) idiay Kamakura.
Ti Kamakura ket isu idi ti pinaka-kapital a siyudad ti Hapon manipud MIL SIYENTO WALOPULO KET LIMA (1185) agingga iti MIL TRES SIYENTOS TALLOPULO KET TALLO (1333). Naidisso daytoy idiay Prepektura ti Kanagawa iti Abagatan ti Tokyo. Napanaganan daytoy a turay-militar ti Bakufu Kamakura. Daydi a panangipatakder ni Yorimoto iti bakufu iti daydi a siglo, ket pinangkaritna iti bileg ti emperor. Inyaramidna daytoy a pinang-sabotahe iti panagturay ti korte ti emperor a kas sentro ti gobyerno. Nagtaud ni Yorimoto iti linya a natakneng.
Timmao daytoy nga apo ti kaputotan ni Emperor Seiwa a nagturay idi siglo ken tawen a WALO GASUT KEN LIMAPULO KET WALO agingga iti WALO GASUT KEN PITOPULO KET INNEM kalpasan ti pannakatay ni Kristo wenno (manipud 858 agingga iti 876 AD). Napusek ken awanan pasensiya ni Yorimoto kadagiti kultura ken naituding a tigtignay iti korte imperial. Saanna nga inkankano dagiti seremonyas ti monarkiya ken nobilidad nupay dayta met a linya ti naggapuanna. Ngem inessemanna ti bukodna a bileg ken turay.
Managilem, managsuspetsa ken awan as-asina idi. Uray pay iti uneg ti bukodna a sirkulo iti kagimongan, awan a pulos ti ikas-kasona. Iti daydi panangipatakderna iti bakufu, adu dagiti pinapatayna a tattao. Inus-usigna ti amin ket awan pinalpalabasna, agraman kakabagianna. Idi nadutokan a mangidaulo iti militar a kas shogun, impatakderna daydi immuna a bakufu – ti Bakufu Kamakura. Nagbalin met daytoy a nalaing nga administrador ti gobyerno ken nangimanehar iti panangituray. Iti daydi pannakaipatakder ti ‘bakufu’, nagbalin a ti pudno a bileg ti turay idiay Hapon ket ti turay-militar. Ket nupay adda lehitimo nga emperor iti korte ti pagarian, daydi akem ti emperor ket nagbalin a simbolo laengen ti pagilian."
PLEASE LISTEN TO PODCAST TO CONTINUE FOR THE FULL EPISODE.
