Lukas 2:17,18 Toe hulle Hom sien, het hulle vertel wat oor hierdie Kindjie aan hulle gesê is. Almal wat dit gehoor het, was verwonderd oor wat die skaapwagters hulle vertel het
Nouja, hoe was jou Kersdag gister? Ek vermoed die meeste van ons het 'n ete saam met ons geliefdes geniet. As jy egter 'n gelowige is; hét jy die geleentheid gebruik om jou geloof tydens die ete te deel? Of het jy 'n bietjie verleë gevoel oor jou onvermoë om betekenisvol oor die werklike rede vir die viering te praat?
As jy glo dat dit slegs deur geloof in Jesus is, dat 'n persoon gered kan word van die verskriklike vooruitsig om 'n ewigheid van God geskei te wees (dit is wat 'n Christen glo), behoort jy nie vir mense van Hom te vertel nie?
Moet my asseblief nie verkeerd verstaan nie. Ek wil nie hê jy moet skuldig voel nie. Dit gaan nie oor 'n skuldgevoel nie. Maar ek wil jou herinner aan die wonderlike geleentheid wat jy het, om wanneer jy die nuutheid van lewe wat sy Gees gee, ontvang het, jy dit met ander kan deel. Jy kan met entoesiasme die vreugde en die vrede wat Jesus bring, deel.
Die probleem is dat baie mense verleë is om ander van Jesus te vertel. Jy begin twyfel en verskonings uitdink soos: Sal hulle nie dink ek is 'n godsdienstige fanatikus nie? Sê-nou hulle verwerp my? Ag, ek dink dis soveel beter om die evangelisasie werk aan die kenners oor te laat, of hoe?
Onthou jy daardie herders in die veld aan wie God die geboorte van Jesus aangekondig het; die heel eerste besoekers wat Hom in daardie krip gesien het?
Lukas 2:17-18 Toe hulle Hom sien, het hulle vertel wat oor hierdie Kindjie aan hulle gesê is. Almal wat dit gehoor het, was verwonderd oor wat die skaapwagters hulle vertel het.
Daardie eenvoudige herders, was nie as die belangrike, of hooggeagtes van hulle tyd beskou nie, maar hulle het inderwaarheid die eerste tipe evangeliste geword. God het gewone mense gekies – nie geleerdes nie, nie heersers nie – om die aankoms van die Koning van konings te verkondig. Hierdie wonderlike boodskap van Jesus is nie vir die gekwalifiseerdes gereserveer nie, dit is aan die gewilliges toevertrou.
Dis God se Woord. Vars … vir jou … vandag.
