Efesiërs 4:31-32 Moet nooit verbitter of opvlieënd wees of woedend word nie; moenie vloek of skel nie; moet niks doen wat sleg is nie. Wees goedgesind en hartlik teenoor mekaar, en vergewe mekaar soos God julle ook in Christus vergewe het.
Die probleem met slegte gewoontes is dat dit so ongelooflik moeilik is om hulle af te skud. Ons weet hulle is verkeerd, maar dis asof hulle diep in ons siel gegraveer is. Of is dit net ek wat so sukkel daarmee?
Dubbel-inskrywings-boekhouding is in 1494 deur die Italiaanse wiskundige Luca de Pacioli bekendgestel. Hy het bewys dat daar vir elke debiet in ‘n rekening 'n krediet aan die ander kant van die grootboek moet wees. Dis 'n stelsel wat die toets van die tyd deurstaan het, en die grondslag vir moderne boekhouding deur deursigtigheid en noukeurigheid, gelê het.
Vir elke debiet moet daar 'n krediet wees. Klink dit vir ons bekend as ons na die volgende gedeelte uit Efesiërs kyk?
Efesiërs 4:31-32 Moet nooit verbitter of opvlieënd wees of woedend word nie; moenie vloek of skel nie; moet niks doen wat sleg is nie. Wees goedgesind en hartlik teenoor mekaar, en vergewe mekaar soos God julle ook in Christus vergewe het.
Ons het gister oor die eerste deel gesels, die "moenie-kwaad- doen-nie"-deel, dit klink mos altevol na die debietkant van die grootboek. Kom ons beweeg nou na die kredietkant van die grootboek. Wees goedgesind en hartlik teenoor mekaar. Daar is 'n draaipunt wat ons van kwaad na goed swaai, van debiet na krediet. Die beginsel is min of meer soos volg:
Moet jouself nie skuldig maak aan woede, wraak, bitterheid, geskel en gevloek nie, maar wees eerder vriendelik teenoor mekaar. Gee vir mekaar om. Vergewe mekaar soos God julle vergewe het op grond van wat Christus gedoen het.
Met ander woorde, wanneer jy in die versoeking kom om kwaad te doen: Stop. Dink. Onthou om te vergewe net soos God in Christus jou vergewe het, en doen eerder goed. Wees eerder lief vir daardie persoon wat nie jou vergifnis verdien nie.
Vervang die debiet met 'n krediet. En daar gee God se Heilige Gees jou die krag om die kwaad wat jy wou doen, te vervang met die goeie, wat Hy jou bemagtig het om te doen.
...moet niks doen wat sleg is nie. Wees goedgesind en hartlik teenoor mekaar...
Dis God se Woord. Vars ... vir jou ... vandag.
