သတင်းထုတ်လွှင့်ချက် - ( EP - 188 )
အောက်တိုဘာလ ၂၃ ရက်၊ ၂၀၂၃ ခုနှစ်။
တင်ဆက်ပေးမယ့် သတင်းတွေကတော့ --- တနင်္သာရီတိုင်းမှာတော့ စစ်ကောင်စီက ဖမ်းဆီးထားတဲ့ လူမှုကူညီ ရေးအသင်းက လူနာတင် ယာဥ်မောင်းတစ်ဦးဟာ စစ်ကြောရေးမှာ သေဆုံးသွားပါတယ်။
ထားဝယ်ခရိုင်၊ ရေဖြူမြို့နယ်ကို စစ်ကြောင်းထိုးလာတဲ့ စစ်ကောင်စီတပ်ဖွဲ့က ရွာသားတစ်ဦးကို ဖမ်းဆီး ပစ်သတ်ခဲ့တဲ့အပြင် အိမ် ၁၇ လုံးကိုလည်း မီးရှို့ဖျက်ဆီးခဲ့ပါတယ်။
စစ်ကိုင်းတိုင်း၊ ယင်းမာပင်မြို့နယ်က စစ်ဘေးရှောင် ၁ ထောင်ကျော် အတွက် စားနပ်ရိက္ခာ၊ ဆေးဝါးနဲ့ အဝတ်အထည်တွေလည်း အရေးပေါ် လိုအပ်နေတယ်လို့ စစ်ရှောင်အရေး ကူညီပေးနေသူတွေက ပြောပါတယ်။
သတင်းပေးပို့ချက်ထဲမှာတော့ ရှမ်းပြည်နယ် တောင်ပိုင်း၊ ဓနုကိုယ်ပိုင် အုပ်ချုပ်ခွင့်ရဒေသ၊ ရွာငံမြို့နယ်မှာ ဒုခရိုင် ရဲမှူးလိုက်ပါလာတဲ့ စစ်ကောင်စီယာဉ်တန်း မိုင်းဆွဲခံလိုက်ရတယ်ဆိုတာနဲ့ ရှမ်းပြည်နယ်မြောက်ပိုင်း မူဆယ် - ကျင်စန်းကျော့ သွားလမ်းပေါ်က အမှိုက်ပုံမှာ ဆာလာအိတ်နဲ့ ထုတ်ထားတဲ့ အလောင်း ၃ လောင်း တွေ့ရှိခဲ့တယ် ဆိုတဲ့အကြောင်း သတင်းပေးပို့ချက်ကို ကြားကြရမှာပါ။
သတင်းနှင့်မီဒီယာကွန်ရက် (Network Media Group) ရဲ့ Podcast အစီအစဉ်ကနေ ကြိုဆိုပါတယ်။ တိုင်းရင်းသားဒေသတွေက အဖြစ်အပျက်တွေနဲ့ ဆက်စပ်တဲ့ သတင်းတွေကို စုစည်းတင်ဆက်ပေးနေတာဖြစ်ပါတယ်။ Podcast ထုတ်လွှင့်ချက်တွေကို တိုက်ရိုက်နားဆင်နိုင်သလို ဒေါင်းလုပ် လုပ်ထားပြီး အဆင်ပြေတဲ့အချိန်မှာ နားထောင်ရင်လည်း ရပါတယ်။
