သတင်းထုတ်လွှင့်ချက် - ( EP - 255)
မတ်လ ၁၃ ရက်၊ ၂၀၂၄ ခုနှစ်။
တင်ဆက်ပေးမယ့် သတင်းတွေကတော့ ---- ကချင်ပြည်နယ်၊ ဗန်းမော်မြို့နယ်၊ ကမ်းနီရွာထဲကို စစ်ကောင်စီတပ်က ပစ်ခတ်လိုက်တဲ့ လက်နက်ကြီး ကျည် ကျရောက်ပေါက်ကွဲတဲ့အတွက် ကလေး ၃ ယောက် အပါအဝင် ဒေသခံ ၅ ယောက် ထိမှန်သေဆုံးခဲ့ပါတယ်။
၂၀၂၄ ခုနှစ် အစောပိုင်း ၂ လကျော်ကာလအတွင်း စစ်ကောင်စီ လက်အောက်ခံ တရားရုံးတွေကနေ မတရား ပုဒ်မ တွေနဲ့ ထောင်ဒဏ်ချမှတ်ခံရသူ ၆၅ ဦးရှိတယ်လို့ နိုင်ငံရေး အကျဉ်းသားများ ကူညီစောင့်ရှောက် ရေးအသင်း AAPP က ပြောပါတယ်။
ရှမ်းပြည်နယ် တောင်ပိုင်း ဆီဆိုင်မြို့ထဲကို စစ်ကောင်စီတပ်က လက်နက်ကြီးတွေ၊ ဒရုန်းတွေနဲ့ အဆက်မပြတ် ပစ်ခတ်ခဲ့တဲ့အတွက် လူနေအိမ်တွေ အများအပြား မီးလောင်ပျက်စီးခဲ့တယ်လို့ ပအိုဝ်းအမျိုးသား လွတ်မြောက် ရေးတပ်မတော် PNLA က ပြောပါတယ်။
တနင်္သာရီတိုင်း ထားဝယ်မြို့နယ်က မောင်မယ်ရှောင်ကျေးရွာထဲကို လက်နက်ကြီးကျရောက် ပေါက်ကွဲ တဲ့အ တွက် ဒေသခံ ၂ ဦး ထိခိုက်ဒဏ်ရာ ရရှိခဲ့ပြီး သာသနိက အဆောက်အအုံတွေလည်း ထိမှန်ပျက်စီးခဲ့တယ်လို့ ရွာသားတွေက ပြောပါတယ်။
သတင်းပေးပို့ချက်ထဲမှာတော့ စစ်ကောင်စီရဲ့ နိုင်ငံရေးဝှက်ဖဲတွေ နောက်မှာ မျှောပါမသွားပဲ လုပ်စရာရှိတာကို ပြတ်ပြတ်သားသား လုပ်ဆောင် ကြဖို့ အမျိုးသား ညီညွတ်ရေး အစိုးရ NUG ယာယီ သမ္မတ ဒူဝါလရှီးလ က တိုက်တွန်းပြောဆို လိုက်တဲ့အကြောင်းကို ကြားကြရမှာပါ။
သတင်းနှင့်မီဒီယာကွန်ရက် (Network Media Group) ရဲ့ Podcast အစီအစဉ်ကနေ ကြိုဆိုပါတယ်။ တိုင်းရင်းသားဒေသတွေက အဖြစ်အပျက်တွေနဲ့ ဆက်စပ်တဲ့ သတင်းတွေကို စုစည်းတင်ဆက်ပေးနေတာဖြစ်ပါတယ်။ Podcast ထုတ်လွှင့်ချက်တွေကို တိုက်ရိုက်နားဆင်နိုင်သလို ဒေါင်းလုပ် လုပ်ထားပြီး အဆင်ပြေတဲ့အချိန်မှာ နားထောင်ရင်လည်း ရပါတယ်။
