သတင်းထုတ်လွှင့်ချက် - (EP - 289)
ဇွန်လ ၄ ရက်၊ ၂၀၂၄ ခုနှစ်။
တင်ဆက်ပေးမယ့် သတင်းတွေကတော့ --- လားရှိုးမှာ စစ်ကောင်စီတပ်နဲ့ ပြည်သူစစ်အဖွဲ့တွေ ပူးပေါင်းပြီး ဒေသခံ ခရီးသွားတွေဆီကနေ အကြောင်းအမျိုး မျိုးပြပြီး ငွေကြေးတောင်းခံမှုတွေကို ပြုလုပ်နေတယ်လို့ ခရီးသွားတွေက ပြောပါတယ်။
တနင်္သာရီတိုင်း သရက်ချောင်းမြို့နယ်ထဲက ကျေးရွာတွေမှာ တပ်စွဲ နေထိုင် ခဲ့တဲ့ စစ်ကောင်စီတပ်ဖွဲ့က ရွာသား ၁၀ ယောက်ထက် မနည်းကို သတ်ဖြတ်ခဲ့ပြီး နေအိမ်အလုံးရေ ၅၀ ကျော်ကို မီးရှို့ ဖျက်ဆီး သွားခဲ့ပါတယ်။
ထားဝယ်မြို့နယ်ထဲက စစ်ကောင်စီတပ်ရင်းတစ်ခုကနေ ထွက်လာတဲ့ အိမ်စီးကားတစ်စီး ပစ်ခတ်ခံရပြီး ဗိုလ်ကြီး တစ်ယောက် သေဆုံးသွားတယ်လို့ ဒေသခံတွေက ပြောပါတယ်။
တိုက်ပွဲတွေကြောင့် ချင်းပြည်နယ်က ဒေသခံတွေဟာ အိုးအိမ်စွန့်ခွာထွက်ပြေးနေရပြီး ပြည်နယ်ရဲ့ လူဦးရေ ထက်ဝက်နီးပါးခန့် စစ်ဘေးရှောင်နေရတယ်လို့ ချင်းလူ့အခွင့်အရေးအဖွဲ့ CHRO က ထုတ်ပြန်ပါတယ်။
သတင်းပေးပို့ချက်ထဲမှာတော့ မြန်မာနိုင်ငံတစ်ဝှမ်းမှာရှိတဲ့ လူငယ်ပြုပြင်ရေး စခန်းတွေမှာ ဖမ်းဆီးထိန်းသိမ်းခံ ထားရ တဲ့ အသက်မပြည့်သေးတဲ့ အမျိုးသမီးတွေ လူ့အခွင့်အရေး ချိုးဖောက်ခံနေရတဲ့အကြောင်းကို ကြားကြ ရမှာပါ။
သတင်းနှင့်မီဒီယာကွန်ရက် (Network Media Group) ရဲ့ Podcast အစီအစဉ်ကနေ ကြိုဆိုပါတယ်။ တိုင်းရင်းသားဒေသတွေက အဖြစ်အပျက်တွေနဲ့ ဆက်စပ်တဲ့ သတင်းတွေကို စုစည်းတင်ဆက်ပေးနေတာဖြစ်ပါတယ်။ Podcast ထုတ်လွှင့်ချက်တွေကို တိုက်ရိုက်နားဆင်နိုင်သလို ဒေါင်းလုပ် လုပ်ထားပြီး အဆင်ပြေတဲ့အချိန်မှာ နားထောင်ရင်လည်း ရပါတယ်။
