OPEN HEAVENS
MATALA LE LAGI MO LE ASO TOONAI 7 MATI 2026
(tusia e Pastor EA Adeboye)
Manatu Autu: A iai le malamalama 3 (When there is light 3)
Tauloto Tusi Paia: Mataio 5:15 “Latou te lē tutuina fo‘i le molī i le tu‘u ai i lalo o le mea e fua a‘i saito, ‘ae tu‘u i luga lava o le tu‘ugāmolī ‘ia pupula atu ai i ē o i le fale uma.”
Faitauga - Tusi Paia: Ioane 4:7-18, 25-30
O se tasi o o’u afafine fa’aleagaga, o se uo, ma sa vasega faatasi ma lo’u toalua, sa feagai ma se faafitauli tele- kanesa o le alāleo po o le fa’a’i (tulou). Sa fai mai foma’i pau le auala e laveaiina ai lona soifua o le aveese o lona alāleo, o lona uiga e lē mafai ona toe tautala. Na fai lona ta’otoga ma na amata ai i lea aso ona lē toe mafai ona tautala le afafine. Peita’i na fa’aauau pea la matou tatalo ma le loto talitonu e faamalolō o ia e le Atua. O se tasi aso ina ua faatoa ou fo’i mai i se malaga ae ou vaaia se fafine o ta’avalevale i luga o le fola o le fale. Ina ua tepa mai i luga sa ou iloa atu ai o le uō a lo’u toalua ma sa faapea mai, “o a’u lenei Tamā, ua toe mafai ona ou tautala.”
Le au pele e, e lē mafai ona e maua le ituaiga vavega e pei ona fa’amatala i le tala ae lē faia sau molimau. O le ituaiga vavega lea e fa’agaganaina tagata uma o loo siomia oe ma ta’utino ua na o le Atua e faia ma tutupu ai vavega. A suluia e le malamalama o le lalolagi se tagata, e lē mafaia e lea uso ona taofiofi lona fofoga e lē tautala. O le fafine Samaria i le faitauga mai le Tusi Paia o le asō, na avea ma fai evagelia i le taimi na fetaia’i ai ma le malamalama. Na alu atu o ia i lona nuu ma tāla’i atu i tagata uma e omai e vā’ai i le malamalama. E lē mafai ona e maua le malamalama ma nanā i lalo o le mea e fua a’i saito (Mataio 5:15).
O le malamalama ua lē na o faamanuiaga ma vavega na te momoli maia; e sau fo’i ma galuega ma tiute fai. Ina ua uma ona fa’asa’oloto le tagata ululeaga o Katara i le Mareko 5;2-20, na ave i ai e Iesu se galuega e fai, o le ta’u ma faamatala i isi tagata e uiga i le vavega na faia e Iesu mo ia. E le mafai ona sau se uso i le malamalama ae fa’aauau pea ona ola i se olaga fa’asamasamanoa. I le malamalama e tatau lava ona e faataunuuina le finagalo o le Atua. Ina ua uma le fa’asa’olotoina o le tagata faavalevalea, na alu atu o ia i nofoaga uma ma tāla’i atu i tagata, “O a’u o se tagata sa leaga le ulu ma mau i tuugamau, peita’i na ma fetaia’i ma le malamalama, ma avea ai nei a’u ma fai evagelia.”
Na faapena fo’i ina ua maua Peteru e le malamalama, na avea o ia ma fai faiva o tagata. Ina ua o’o Paulo i totonu o le malamalama mamalu lenei na avea o ia ma misionare lauiloa, na tala’iina le talalelei i soosemea. E lē mafai ona e sau i le malamalama ae tumau le nofonofovale. O le malamalama e faamalosi’auina tagata e o atu i le lalolagi ma lauga le talalelei i tagata uma lava (Mareko 16:15).
Le au pele e, soosemea e te alu i ai, e finagalo le Atua ia e fa’asusulu atu lona malamalama. Fai ma valaauina o lou olaga le ta’uta’u i tagata uma e te fetaui i ai, e uiga i le mata’utia o le malamalama na fa’asa’olotoina oe. Ou te tatalo mo oe i le asō ia suluia oe e le malamalama ma avatu ia te oe se ta’utinoga e lē mafai ona e natia, o le a e tala’ia se tala fou ma usu se pese fou, i le suafa o Iesu, Amene.
