OPEN HEAVENS
MATALA LE LAGI MO LE ASO LUA 22 SETEMA 2026
(tusia e Pastor EA Adeboye)
Manatu Autu: Aua e te fefe (Fear not)
Tauloto Tusi Paia: Isaia 41:10 “Aua ‘e te fefe, auā ‘ou te ‘iā te oe; ‘aua le fētepatepa‘i, auā o a‘u o lou Atua; ‘ou te fa‘amalosia oe. E moni, ‘ou te fesoasoani ‘iā te oe; e moni, ‘ou te tāofia oe i lo‘u lima taumatau e i ai le amiotonu.”
Faitauga - Tusi Paia: Ioane 20:19-23
O nisi o tagata suesue popoto o le Tusi Paia fai mai, a e saili auiliili i le Upu a le Atua, e te iloa ai, o le fuaiupu, ‘aua le fefe’ e faa 365 ona taua i le Tusi Paia. O lona uiga afai o e fefe i se mea, e iai le upu a le Atua mo oe i aso taitasi o le tausaga, ‘aua le fefe’. Fai mai le Roma 8:37, e te manumālō a‘ia‘i i nei mea uma lava, ‘ona o ia ‘ua alofa mai ‘iā te oe. O le mafuaaga mautu e lē tatau ai ona e fefe ona e alofa le Atua ia te oe. Fanau a le Atua, e te iloa ea e alofa le Atua ia te oe? O e mautinoa ea i lona alofa? Afai o lea, aua e te fefe.
Ina ua maea ona toetu mai Iesu Keriso mai le oti ma asiasi atu i lona au soo, na ia fai atu iai latou e aua le fefefe. Ina ua asiasi atu, sa matua fefefe aua foi ua faasatauroina o ia. O le faitauga mai le Tusi Paia o le asō, fai mai, sa tapuni le faitotoa ao mafuta faatasi ona o le fefefe. O se tasi o tulaga matagofie o le asiasi atu o le Atua, a finagalo loa le Atua e asiasi ia te oe, e leai se faitotoa e mafai ona taofia o ia, aua o ia o le faitotoa o le lafu mamoe ( Ioane 10:7). O soo se taimi e te fefe ai, e asiasi atu ia te oe ma faapea atu, ‘Aua e te fefe’. I le Ioane 14:1, na fetalai Iesu “Aua le atuatuvale o ‘outou loto; ‘ia ‘outou fa‘atuatua i le Atua, ‘ia fa‘atuatua mai fo‘i ‘iā te a‘u.” A e talitonu i le Atua Matautia, e leai se mafuaaga e te fefe ai fua. Tusa pe tuitui atu le fefe i le faitotoa o lou loto, e asiasi atu le Atua, e faamautinoa atu ia te oe lona alofa. Ou te folafola atu i le suafa e sili i suafa uma lava, ua e saoloto mai soo se saisaitiaga o le fefe o loo e iai.
Fai mai le 1 Ioane 4:18, o le fefe e faasalaina. O soo se mea e iai le fefe, o le saisaitia, taotaomia ma le faagata e tino mai. E lē finagalo le Atua e te ola i lalo o saisaitiaga o le fefe. Peitai e finagalo ia te oe e te ola i le faatuatua aua a iai le faatuatua, e sola ese le fefe. Afai e te mautinoa o le Atua o lou fesoasoani, e te lē fefe i se mea e faia e se tagata ia te oe ( Eperu 13:6). A e iloa ma faamautinoaina le alofa o le Atua,e te lē fefe pe a e fetaiai ma se matagi aua e te iloa e lē tuulafoaia oe e le Atua e te oti.
Le au pele e, aua e te fefe. E alofa le Atua ia te oe ma e na te lē tuua oe ( Eperu 13:5). E alofa o ia ia te oe, o lea, tuu atu mea uma o e fefe ma atugalu ai ia te ia. E alofa le Atua ia te oe, aua e te fefe, i le suafa o Iesu, Amene.
