OPEN HEAVENS
MATALA LE LAGI MO LE ASO LULU 18 MATI 2026
(tusia e Pastor EA Adeboye)
Manatu Autu: Manatua Lē na faia oe (Remember your creator)
Tauloto Tusi Paia: Failauga 12:1 “O lenei, ‘ia e manatua lē na faia oe i ona po o lou taule‘ale‘a, a o le‘i o‘o mai aso leaga, a o le‘i o‘o mai fo‘i tausaga ‘e te fa‘apea ai, “E leai so‘u fiafia i ai.”
Faitauga - Tusi Paia: Mareko 11:12-20
O loo taua i le faitauga o le Tusi Paia o le asō le tala ia Iesu ina ua ia silasila mamao atu i le laau o le mati ma agai atu iai ona ua fia tausami. Ina ua oo atu i le laau, ua ia iloa ai e leai se fua e ui e tele ona laulaau, ona ia fetuu ai lea o le mati. O se lesona e aoaoina ai i tatou mai lenei tala, e finagalo le Alii ia fua mai soo se mea o iai le ola, na ia faia mea uma i lona lava finagalo (Faaaliga 4:11) e faaalia ai lona viiga.
O se tasi o vaega ou te lē malamalama ai i soo se taimi ou te faitauina ai lenei fuaitau mai le faitauga o le Tusi Paia o le asō, e lei oo i le fuata o le mati ( Mareko 11:13). E masani ona ou manatu, ‘afai e lei oo i le fuata o le mati, aisea na manatu ai Iesu e tatau ona fua le mati?’. Na ou iloa mulimuli, a oo i le faatulagaina o taimi, o le taimi a le Atua o le taimi tonu lea. Mo se faataitaiga, a fafagu oe e le Atua i le 3 poo le 4 i le vaveao, e sese lou fai i le Atua ua vave tele lea taimi e te ala ai. Tusa poo le a le taeao po e fafagu ai oe e le Atua Silisili, o lona uiga ua amata lou aso, o Lana taimi o le taimi tonu lea.
I le tauloto mai le Tusi Paia o le asō, o loo faatonu e le Atua talavou ia manatua o ia a’o taulelea. O lona uiga o le taimi lelei e auauna ai le tagata i le Atuao le taimi o talavou. O le tulaga pito lelei pe a lafoai o latou loto ma soifua i le Atua i le amataga o latou olaga, aua o i latou e muai saili i le Atua e latou te maua lava o ia (Faataoto 8:17). Afai o oe ose tagata talavou ae o loo e faalogologo pe faitau i lenei faamalosiau, e finagalo le Atua e maua lou loto i le taimi nei, e finagalo e fua mai ni fua mai lou olaga mo lona malo ao e taulealea. E finagalo le Atua e te malosi i le loto, e auauna ai ia te ia (Roma 12:11). Aua le faamaimauina lou talavou i le faia o le agasala pe faaleagaina i le finauina o mea e lē taua, ae ia muai saili le Alii. Aua nei e faapei o le laau o le mati, e leai ma se fua e ofoina atu mo Iesu ao ia saili atu mo se fua. O loo aumai le poloaiga a le Atua iai tatou ia fua tele mai ma uluola (Kenese 1:28), peitai o le fua tele mai, e tatau ona totoina se mafutaga vavalalata ma le Alii aua e leai se mea e mafai ona e faia e aunoa ma ia (Ioane 15:4).
Le au pele e, ou te aioi atu ia te oe ia e manatua Lē na faia oe i aso o lou taulealea. Tusa pe te lē o toe talavou, lafoai ma tuuina atu lou ola o totoe e auauna ai ia te ia, ona ia faamatagofieina lea o lou ola i lona mamalu. Ia e manatua Lē na faia oe, i le taimi nei, i le suafa o Iesu, Amene.
