OPEN HEAVENS
MATALA LE LAGI MO LE ASO SA 15 MATI 2026
(tusia e Pastor EA Adeboye)
Manatu Autu: Matua Mataala 1 (The Intentional Parent 1)
Tauloto Tusi Paia: Faataoto 22:6 “A‘oa‘o ia i le tama e tusa ma lona ala; a o‘o ‘ina toeaina lava o ia, e le te‘a ‘ese ai.”
Faitauga - Tusi Paia: Teuteronome 6:6-9
O le faamoemoe o le Atua mo matua ia o latou magafagafa e a’oa’o a latou fanau ia maua ai so latou nonofo lelei. O le naunau e a’oa’o le fanau e fua mai ai le tele o mea lelei, peita’i o le mala pagā pe a lē a’oa’ia e matua a latou fanau i le ala sa’o. Fai mai le Faataoto is 17:21 o le na te fanaua le vale e fai lea mona fa’anoanoaga, i se isi fa’aupuga, afai e le manana’o matua e soifua faanoanoa i aso o totoe o latou soifua e ao la ona a’oa’i fanau i ala o le Alii. Fai mai le Faataoto 10:1; o le atalii poto na te faafiafia lona tamā a’o le tama valea e faanoanoa ai lona tinā. O lona uiga a popoto le fanau, e matata’u i le Alii ma mulimuli i ona ala, e olioli ai o latou matua. Peita’i a valelea i latou ma lē mulimuli i ala o le Alii, latou te faatupu le faanoanoa i o latou matua. E le o se tulaga e tau fai ai se tonu mo matua e faatonu lelei fanau i le ala e tatau ona ui ai. E taua tele auā na poloaiina e le Atua matua i le faitauga mai le Tusi Paia o le asō ia a’oa’o a latou fanau i ala o le Atua i so’ose avanoa e maua.
O le a’oa’oina o fanau i ala o le Alii e amata i le fa’amautinoa ua faatumuina i latou i le Upu a le Atua. O matua e magafagafa ma faaalu lo latou taimi e tauloto ai Afioga Paia a le Atua ma a’oa’o a latou fanau e fa’ata’ita’i atu ia i latou, auā a teu loto le Upu a le Atua o le a fesoasoani iā i latou e ‘alo ese ai mai le agasala (Salamo 119:11). Ma le faanoanoa, o le taulotoina o Afioga Paia a le Atua ua toetoe a le toe faia e le toatele o kerisiano. A o talavou lo’u olaga kerisiano sa fai ma a’u masani le tauloto o le Tusi Paia e lē aunoa. O le taulotoina o le upu sa avea ma fesoasoani tele mo a’u. Fa’ata’ita’iga a o’u malaga i atunuu e le faatagaina tagata malaga e o atu ma ni Tusi Paia i totonu o latou laufanua, o le upu a lea sa ou taulotoina ou te tua i ai. Paga lea e toatele Kerisiano i aso nei latou te lē faitaua le Tusi Paia pe tauloto fo’i.
E tāua tele mo matua ma kerisiano uma, ia teu le upu a le Atua i o latou loto. O se poloaiga, e pei ona o tatou vaaia i le Tusi Paia faitau o le asō. O le tele o mea i le loto e tautala mai ai le gutu (Mataio 12:34). O nisi kerisiano latou te lē iloaina le gaogao i i o i latou i le upu a le Atua vagana ua tupu se faalavelave faafuasei auā seiloga e omia se fagupa’u faatoa iloa mea o i totonu.
Le au pele e, o mea o loo fa’atumulia ai lou loto o mea fo’i na e te liligi atu I olaga o tagata o tou mafuta e aofia ai ma lau fanau. Afai o oe o se matua, afai e lē o fa’atumulia oe i le Upu a le Atua e lē mafai fo’i ona e a’oa’oina lau fanau i ala o le Atua, i le suafa o Iesu Amene.
