OPEN HEAVENS
MATALA LE LAGI MO LE ASO GAFUA 16 MATI 2026
(tusia e Pastor EA Adeboye)
Manatu Autu: Matua Mataala 2 (The Intentional Parent 2)
Tauloto Tusi Paia: Faataoto 29:17 “Ia e a‘oa‘i i lou atali‘i, ‘ona e maua ai lea se filemū; e tupu ai le fiafia i lou loto.”
Faitauga - Tusi Paia: Salamo 1:1-6
O ananafi, na ou taua ai o le finagalo o le Atua ia aoao e matua a latou fanau i ona ala. Na ou faasoa atu foi i le auala e faigofie ai pe a faatumulia matua i le Upu a le Atua, o se laasaga muamua lea i le aoaoina o fanau i ala o le Alii.
E taua i matua ona amio atua i taimi uma. E masani ona faaaoao tamaiti i mea e vaai o faia e isi tagata, aemaise lava o latou matua. Afai e faatumulia matua i le Upu a le Atua, e faigofie foi ona fiafia tamaiti i le Upu a le Atua. O matua e masani i le tatalo ma faatonu le fanau e tatalo faatasi, o loo latou saunia se siomaga e aoao ai latou fanau i se olaga tatalo. O soo se taimi ou te alu ai e asiasi lau fanau ao i le aoga, e masani ona matou o ma savalivali faatasi. Ao faia matou savaliga, ou te faamanatu iai latou le Upu a le Atua ma tatalo ma i latou. O soo se avanoa ou te maua ma i latou, ou te faamautinoaina ou te aoao iai latou i le Upu a le Atua ma faapefea ona faaaoga i soo se vaega o le olaga. O le mafuaaga lena i le taimi nei ua avea ma tagata matutua, ae o loo latou galulue malosi e auauna i le Atua.
A aoao e matua latou fanau i ala o le Alii, e maua e i latou le filemu, e pei ona tusia i le tauloto mai le Tusi Paia o le asō. Peitai, afai e lē ola matua i le ala tonu e tatau ona ola ai le fanau, e lē tatau ona faateia i latou pe a ola i le agasala le fanau. O le faanoanoaga, o le ola agasala o nisi matua ua taitai ese ai le fanau mai le ola auauna i le Atua.
E tatau i matua ona faia ni faaiuga mautū ma ia filigā i le aoaoina ma le fuafuaina o olaga o latou fanau e ala i le tatalo i taimi uma. E tatau ona latou folafola ma tautino le Upu a le Atua i o latou olaga ae ia taofia le faia o upu fetuu i o latou luga aemaise pe a oso le ita. E malosi le laulaufaiva ma e iai le mana o le ola ma le oti ( Faataoto 18:21).
O le taimi lelei e amata ai ona aoao le fanau i ala o le Alii o le taimi o laiti faatoa amata ona tautatala, ina ia pulea e le Upu o latou agaga ao tuputupu a’e. Tusa foi pe oo ina avea ma tagata matutua, e tatau i matua ona faamanatu pea iai latou le upu a le Atua ma folafola i luga o latou olaga. E tatau ona aoaoina a latou fanau i le Upu a le Atua i taimi uma (Teuteronome 6:6-9).
Le au pele e, e finagalo le Atua i lana fanau e maua le filemu pe a latou matutua. O le mafuaaga lea e tatau ai i matua ona aoao a latou fanau i le ala tonu ina ia latou avatu le filemu ma le malolo i matua pe a oo ina matutua, i le suafa o Iesu, Amene.
