OPEN HEAVENS
MATALA LE LAGI MO LE ASO LUA 17 MATI 2026
(tusia e Pastor EA Adeboye)
Manatu Autu: Matua Mataala 3 (The Intentional Parent 3)
Tauloto Tusi Paia: Mataio 7:17 “E fa‘apea fo‘i la‘au lelei ta‘itasi ma fua mai i fua lelei; a o le la‘au leaga e fua mai i fua leaga.”
Faitauga - Tusi Paia: Salamo 34:1-3
I aso e lua ua mavae atu, sa ou talanoa atu i le taua o le aoao lelei o fanau e matua i ala o le Atua faapea ma nisi o mea e tatau ona latou faia e ausia ai. O se tamaitiiti e lē lelei le aoaoina, e matua ane e avea ma se faafitauli i le nuu ma le atunuu. Peitai, a aoao tamaiti ia ala o le Atua, e matutua ane, e avea ma tagata e faafiafia i matua ma e fia faataitai iai le toatele.
Ao faaiu atu lenei aoaoga faasolo i le asō, ou te toe fia taua e tatau i matua ona aoao a latou fanau i le upu a le Atua, o ona ala, ma ana poloaiga i taimi uma. Mo se faataitaiga, e tatau ona aoao e matua latou fanau ao i totonu o le fale, pe a o ese ma le fale, pe a nonofo i lalo, tutū po o le taooto i lalo ( Teuteronome 6:5-9). Ou te fia talanoa atu i se tasi o vaega taua e tatau i matua ona faia i taimi uma ia avea ma masani, o le loto faafetai.
I le faitauga o le Tusi Paia o le asō, fai mai Tavita, ou te fa‘afetai i le ALI‘I i aso uma lava; e lē aunoa ona vi‘iga i lo‘u gutu. O se tasi lea o vaega taua e tatau ona faia e matua e lē aunoa, e tatau ona faafetai i le Alii i aso uma. O nisi o fale o kerisiano, e tumu i le tomumu, faaseā ma soo se talanoa e lē lelei. O le tausia o tamaiti i lea siosiomaga e aoaoina ai i latou i ni manatu tetee pe a oo ina avea tagata matutua. Fai mai le 1 Tesalonia 5:18, ia outou faafetai i le Atua i mea uma lava, tusa poo le a le faaletonu o iai. Ia faataga e matua ona tafe atu le loto faafetai mai o latou laugutu i taimi uma ina ia faataitai iai latou fanau. O le tele o faafitauli i nuu ma atunuu i nei aso ona o le toatele o tagata matutua ua leai se loto faafetai, e manatu o le tele o mea, e aia tutusa iai.
I le Kenese 22:1-18, ao ave e Aperaamo ia Isaako i luga o le mauga o Moria e ave o ia e osi ai le taulaga, na fesili Isaako i lona tama poo fea le tamai mamoe e osi ai le taulaga. O loo faaalia ai na iloa lelei e Isaako e leai seisi e alu e tapuai i le Atua ae leai se taulaga. Sa aoaoina o ia i le ositaulaga ma le tapuaiga o le faafetai mai lona tamā aua na vaai iai o faia e lona tamā.
O le avatu o le faafetai o se vaega taua e faia e matua e aoao ai a latou fanau i ala o le Alii. O matua e lē loto faafetai e lē tatau ona manatu e faia e latou fanau. O matua lē loto faafetai e latou te tausia ma faafaileleina tamaiti e tutupu ane, e leai se loto faafetai, i le suafa o Iesu, Amene.
