OPEN HEAVENS
MATALA LE LAGI MO LE ASO TOONAI 21 MATI 2026
(tusia e Pastor EA Adeboye)
Manatu Autu: Maua’a I Fa’amanuiaga (Rooted In Blessings)
Tauloto Tusi Paia: Kenese 12:2 “Ou te faia oe ma nu‘u tele, ‘ou te fa‘amanuia fo‘i ‘iā te oe, ‘ou te matuā fa‘amamaluina lou igoa; e manuia fo‘i oe.”
Faitauga - Tusi Paia: Kenese 28:10-22
O ananafi na o’u tā’ua ai faapea, o fetu’u e osofa’i lava a’a. E tutusa lelei ma fa’amanuiaga fa’a le lalolagi e alu lava i le loloto o i ai a’a. Fa’ata’ita’iga, i le Kenese 22:16 - 18; na fa’amanuia e le Atua Aperaamo e faapea; “O lau fanau fo’i e manuia ai atunuu uma lava o le lalolagi.” I le lua augā tupulaga mulimuli ane ina ua uma ona fa’asesē e Iakopo lona tamā ia fa’amanuia atu ia te ia, na fa’aali le Atua ia Iakopo i se miti ma faapea mai; “O a’u o le Atua o ou tamā, Aperaamo ma Isaako.” O lea fetalaiga ua fa’amanino mai ai o faamanuiaga o i luga o Aperaamo ma Isaako ua sosolo atu iā Iakopo e ala i lo lā so’otaga ma Isaako. I se isi fa’aupuga, na manuia lava Iakopo e le’i fanau mai.
Le au pele e, o le isi taimi e fai atu ai se isi ia te oe, “Faamanuia le Atua ia te oe” aua e te manatu fa’atauvaa i ai. Sa sau se tasi ma fai mai ia te a’u, “Tamā, tatalo mai mo a’u.” Ma sa ou tali atu i ai, “Faamanuia le Atua ia te oe.” Ina ua uma ona o’u faamanuia atu i ai, na musu e alu ona sa mana’o pea e faamatala mai ia te a’u ona faafitauli. E le’i malamalama o ia I le uiga loloto o la’u tala ina ua o’u fai atu, “Faamanuia le Atua ia te oe.” O aso nei ua fa’aaogā e tagata le “faamanuia le Atua ia te oe,” o se fa’afeiloa’i ; Peita’i afai e tauala mai se tasi ua ave i ai e le Atua le pule e fa’amanuia ai oe, e te lē toe manaomia se isi faamanuia e ese atu.
Ua ave e le Atua i tamā le pule e faamanuia ai, o lea la a faamanuia lou tamā ia te oe ona ua malie ma fiafia ia te oe, e sosolo atu i le loloto o a’a. I le Kenese 27:1-4; na fai Isaako ia Esau e alu e tuli mai se manu ma fai ai se meaai manogi se’i ai ai. Sa i ai meaai i le fale peita’i sa ia tapenaina Esau mo se faamanuiaga faapitoa. Ina ua sau Iakopo ma le mea taumafa manogi, o le kuka tonu lava lea na mana’o ai Isaako e sau ma Esau, na fa’asesēina Isaako. Na ia taumafa ma fa’amanuia ia Iakopo. Ina ua iloa e Isaako ua sesē le mea ua ia fai, na ia fai atu iā Esau ua uma ona ia faamanuia ia Iakopo ma e leai se mea e mafai ona ia fai e toe fa’afo’i ai. Na fememea’i Esau ma ole atu i lona tamā mo sina manuia o totoe mo ia. O le manuia itiiti na maua e Esau na matuā iloga ona maua ai iuga tetele o lona olaga auā o tausaga mulimuli ane, a o toe fo’i atu Iakopo i lona aiga, ma sa ta’u atu i ai o lo o agai atu Esau e fa’afetai’ai ia te ia, na amata ona tetemū ma atuatuvale Iakopo o lē sa sili ona tele lana vaega o faamanuiaga na maua. Na faamanuia tele e le Atua lona uso, o lē sa faatauvaa lana vaega o manuia na maua, ua matuā tele lava, na ia te ia auauna e faselau (400).
Atalii e, ma le afafine o le Atua, saili ia e ola i se olaga e faafiafia i le finagalo o lou Tamā o i le lagi ma maua ana faamanuiaga. O le asō ou te folafola i le suafa e sili i suafa uma lava; Faamanuia le Atua ia te oe.
Tatalo
Tamā faamolemole fesoasoani mai ia te a’u ia ou ola i se olaga ou te maua ai ou manuia e puna pea e le uma i le suafa o Iesu, Amene.
